मङ्गलबार ११ बैशाख, २०८१ | Tuesday Apr 23, 2024
काठमाडौंः यसअघि नियुक्त भएर पनि काम गर्न नपाई हटाइएका डा. गोविन्द पोखरेल राष्ट्रिय पुनर्निर्माण प्राधिकरणको प्रमुख कार्यकारी अधिकृत (सिइओ)मा पुनः नियुक्त गरिएको छ ।
मन्त्रिपरिषद्को बुधबार बसेको बैठकले सरकारले प्राधिकरणका सिइओ सुशील ज्ञवालीलाई बर्खास्त गरी डा. पोखरेललाई नियुक्त गरेको हो । राष्ट्रिय योजना आयोगको पूर्वउपाध्यक्ष रहेका उनलाई सुशील कोइराला नेतृत्वको सरकारले सिइओ नियुक्ति गरे पनि पुनर्निर्माण विद्येयक पास नभइसकेका कारण उनको नियुक्तिले पूर्णता पाउन सकेको थिएन ।
पछि एमाले नेतृत्वको सरकारले विद्येयक आएपछि उनको नियुक्तिलाई पूर्णता नदिई आफ्नो पार्टी निकटका ज्ञवालीलाई नियुक्त गरेको थियो । प्युठान रस्पुरकोट निवासी पोखरेल काँग्रेस निकटका हुन । उनी आयोगको उपाध्यक्ष हुनुअघि वैकल्पिक उर्जा प्रवद्र्धन केन्द्रको कार्यकारी निर्देशक थिए ।
सरकारले प्राधिकरणका कार्यकारी समितिका सदस्यहरुलाई भने यथावत् राखेको छ । सरकार फेरिएसँगै सीईओ हटाउन सत्तारुढ कांग्रेसले दबाब दिँदै आएको थियो । हटाइएका ज्ञवालीले भने सरकारले नै असहयोग गरेका कारण आफूले काम गर्न नसकेको भन्दै स्पष्टिकरणको जवाफ दिएका थिए । सुचना तथा सञ्चारमन्त्री सुरेन्द्र कार्कीले उनको जवाफ चित्तबुझ्दो नभएकोले हटाएको बताए ।
पुनर्निर्माणसम्बन्धी ऐन २०७२ अनुसार सीईओलाई हटाउनुपूर्व सफाइको मौका दिनुपर्नेछ । ‘प्रमुख कार्यकारी अधिकृतको काम सन्तोषजनक नभएमा सरकारले निजलाई जुनसुकै बेला हटाउन सक्ने छ,’ ऐनको दफा ११ भनिएको छ ।’
