काठमाडौंः भरतपुर महानगरपालिका वडा नम्बर १९ को पुनः मतगणनाको विरोधमा संसद अवरोध गर्दै आएको विपक्षी दल एमालेले अवरोध नगर्न सहमत भएपछि काँग्रेसका सभापति शेरबहादुर देउवालाई प्रधानमन्त्री हुन बाटो सहज भएको छ ।
सभामुख ओनसरी घर्ती मगरको पहलमा सोमबार सिंहदरबारमा बसेको प्रमुख तीन दलको बैठकमा एमालेका नेताहरुले संसद् बैठक अवरोध नगर्ने बताएका थिए । उनीहरुले भरतपुरको मतगणनाको विवाद अदालतमा विचाराधिन रहेकाले अदालतको फैसला कुर्ने भन्दै अवरोध हटाउन सहमत भएको हो ।
बैठकपछि पत्रकारलाई प्रतिक्रिया दिँदै काँग्रेसका नेता विमलेन्द्र निधिले सदन खुलेसँगै प्रधानमन्त्री पुष्पकमल दाहाल, काँग्रेस सभापति देउवा र प्रमुख प्रतिपक्ष दलका नेता केपी ओलीले सदनलाई सम्बोधन गर्ने जानकारी दिए ।
त्यसलगत्तै सभामुख घर्तीले प्रधानमन्त्री निर्वाचनका क्रममा भएका सबै प्रक्रियाका बारेमा सदनलाई जानकारी गराउने र त्यसपछिको दोस्रो बैठकमा प्रधानमन्त्रीको निर्वाचन हुनेछ ।
प्रदेश र राष्ट्रियस्तरको निर्वाचन सम्पन्न गर्न सबै एकताबद्ध भएर लाग्ने, सरकारले राज्य संरचनालाई निष्पक्षताका साथ उपयोग गर्ने र निर्वाचनलाई सफल पार्ने काममा दृढतापूर्वक लाग्ने सहमति भएको जनाइएको छ ।
पहिलो चरणको निर्वाचनमा देखिएका अनियमितालाई नदोहोर्याउने सङ्कल्प गरिएको एमाले नेता झलनाथ खनालले बताए । माओवादी केन्द्रका नेता नारायणकाजी श्रेष्ठले संसद्को अवरोध हटाउन एमाले समहत भएकाले मङ्गलबार राष्ट्रले नयाँ प्रधानमन्त्री पाउने निश्चित भएको बताए ।