काठमाडौंः नागरिक लगानी कोषले वाइडबडी एयरबस (ए३३०–२००) खरिद गर्न नेपाल वायुसेवा निगमलाई १२ अर्ब रुपियाँ ऋण दिने प्रतिवद्धता जनाएको छ । कोष र निगमबीच सोमबार सोसम्वन्धी सम्झौता भएको हो ।
सम्झौतापत्रमा कोषका कार्यकारी निर्देशक रामकृष्ण पोखरेल र निगमका महाप्रवन्धक सुगतरत्न कसांकारले हस्ताक्षर गरे । निगमले आइतबार जहाज कर्मचारी सञ्चय कोषसँग पनि सोही रकम बराबरको ऋण सम्झौता गरेको थियो ।
दुवै कोषले सरकारको जमानतमा निगमलाई जहाज किन्न ऋण दिन तयार भएका हुन । यस्तो ऋणको ब्याजदर नौ प्रतिशत कायम गरिएको छ भने यस्तो ब्याजदर पहिलो व्यवसायिक उडान नभएसम्मको लागि परिवर्तन नहुने ब्यवस्था गरिएको छ । उक्त जहाज खरिदको लागि कोषले उपलब्ध गराएको क्रणको भुक्तानी अवधि १५ बर्षको राखिएको छ ।
उडान क्षेत्रको व्यवसायिक योजनामा कोषले निगमलाई क्रण दिने कार्य पहिलो पटक गरेको हो । यसबाट प्रत्यक्ष रुपमा आर्थिक समृद्वि, रोजगारी सिर्जना ,पर्यटन क्षेत्रमा थप विकास हुने आशा कोषले गरेको छ । करिव दुई महिनाअघि निगमले वाइडबडी जहाज किन्न अमेरिकाको एएआर कर्पोरेशनसँग २४ अर्ब रुपियाँको खरिद बिक्री सम्झौता गरेको थियो । त्यसमध्ये केही रकम दुवै कोषबाट लिएर निगमले चाँडै एएआरलाई पठाउने तयारी गरेको छ ।
जहाज किन्न गत माघमा भएको समझदारीअनुसार निगमले बैनावापतको १० करोड रुपियाँ फागुनको पहिलो साता नै पठाइसकेको थियो । ऋण लिने विषयमा सस्तो ब्याजदरमा ऋण दिने भन्दै केही विदेशी कम्पनीको प्रस्ताव आए पनि तीनको विश्वसनीयता र स्रोतको वैधानिकतामा प्रश्न उठेपछि निगमले सरकारी स्वामित्वका दुईवटा कोषसँग नै ऋण लिन प्रक्रिया अघि बढाएको हो ।
एएआरसँग भएको सम्झौताअनुसार दुईमध्ये पहिलो जहाज आउँदो मंसिरसम्म र अर्को फागुनसम्म आइपुग्नेछ । यी जहाजबाट निगमले कोरिया, जापान, अष्ट्रेलिया, दमामको उडान सुरु गर्ने जनाइएको छ ।
