काठमाडौंः स्थायी तथा अस्थायी संरचनाको निर्माण गर्दा इटाको विकल्पमा प्रयोग गरिने इको प्यानलको जोडाइमा प्रयोग हुने एडिसिभ सिमेन्टको नेपालमै उत्पादन सुरु भएको छ ।
हालसम्म विदेशबाट आयात गरी प्रयोग भइरहेकोमा नेपालमै पहिलो पटक गोर्खा इको प्यानलले यो सिमेन्टको उत्पादन थालेको हो । यो सिमेन्ट इको प्यानलको जोडाइका साथै बाथरुम र किचेनका टायलहरु टाँंस्न प्रयोग गरिन्छ ।
एडिसिभ सिमेन्ट अन्य सिमेन्टभन्दा फरक हन्छ । सामान्य सिमेन्ट भन्दा यसको कम्प्रेसिभ स्ट्रेन्थ (जोडाई क्षमता) मजबुत हुने भएकाले इको प्यानलको जोडाइमा यही सिमेन्ट आवश्यक पर्छ ।
उत्पादित सिमेन्ट प्रति बोरा ५० किलोको छ । यसअघि चीनबाट आयात गरिआएकोमा अहिले बहराइनस्थित साझेदार कम्पनी अल खाजाको प्रविधि नेपालमा भित्राइ यसको उत्पादन नेपालमै सुरु गरेको गोर्खा इको प्यानलका प्रमुख कार्यकारी अधिकृत कृष्णभक्त दुवालले बताए ।
भारतबाट आयातित प्रिफ्याब प्यानलहरुले ज्वाइन्टमा सिमेन्टको प्रयोग नगरे पनि गोर्खा इको प्यानलले यो सिमेन्ट प्रयोग गर्दै आएको दुवालले बताए । प्रयोगशालामा परीक्षण पछि मात्रै यो सिमेन्ट बजारमा पठाउने उनले बताए ।
सकेसम्म अत्याधिक स्वदेशी कच्चा पदार्थ प्रयोग गरेर एडिसिभ सिमेन्टको उत्पादन भइरहेको भन्दै दुवालले यसको प्रयोगले इको प्यानलमा भएका टङ्की एण्ड ग्रुभको जोडाई मजबुत हुने बताए ।
यो सिमेन्ट चाँंडो सुक्ने भएकोले काम गर्न सहज हुने बताइएको छ । एडिसिभ सिमेन्टको उत्पादन थालेको गोर्खा इको प्यानल स्वदेशमै इको प्यानल उत्पादन गर्ने नेपालकै पहिलो कम्पनी हो । यो आइएसओ ९००१स् २०१५ चिन्ह प्राप्त कम्पनी पनि हो ।
