काठमाडौंः असार १४ गते हुने दोस्रो चरणको स्थानीय निर्वाचनका लागि सम्पूर्ण तयारी पूरा भइसकेको निर्वाचन आयोगले जनाएको छ । प्रदेश नम्बर १, ५ र ७ का ३५ जिल्लामा पर्ने ३३४ नगर तथा गाउँपालिकाका जनप्रतिनिधि चयन हुन लागेको हो ।
पहिलो चरणअन्तर्गत ३, ४ र ६ नम्बर प्रदेशमा गएको वैशाख ३१ गते निर्वाचन सम्पन्न भइसकेको छ । दोस्रो चरणमा एक महानगर, सात उपमहानगर, १११ नगर र २१५ गाउँपालिकाको निर्वाचन हुँदैछ । यसअघि पहिलो चरणमा २८३ स्थानीय तहमा निर्वाचन भएको थियो । प्रदेश नम्बर २ का आठ जिल्लाको स्थानीय तहमा तेस्रो चरणमा असोज २ गते निर्वाचन तोकिएको छ ।
दोस्रो चरणका लागि शान्ति सुरक्षासहित निर्वाचनको सम्पूर्ण तयारी पूरा भइसकेको प्रमुख निर्वाचन आयुक्त अयोधिप्रसाद यादवले बताएका छन् । मतपेटिकासहित निर्वाचन सामग्री मतदान केन्द्रमा पुगिसकेका र कर्मचारी तथा सुरक्षाकर्मीसमेत ती केन्द्रमा परिचालित भइसकेको आयोगले जनाएको छ । ती केन्द्रमा मतदातालाई परिचय वितरणको काम पनि करिव सकिएको र मतदातालाई नमुना मतदान अभ्याससमेत गराउने काम भइसकेको छ ।
पहिलो चरणमा जस्तो धेरै मत बदर नहोस भनेर आयोगले सावधानी अपनाएको र मतदाता शिक्षालाई जोड दिएको यादवले बताएका छन् । मतदानको अघिल्लो दिनसम्म मतदाता शिक्षाका कार्यक्रम जारी रहने उनले बताए । मतपत्र ठूलो हुँदा मतदाता अलमलमा परी पहिलो चरणमा ११ दशमलव १८ प्रतिशत मत बदर भएको आयोगले जनाएको छ ।
दोस्रो चरणको निर्वाचनमा मतदान गर्नसक्ने ६४ लाख ३२ हजार ७६५ मतदाता आयोगको सूचीमा छन् । पैंतिस जिल्लाका आठ हजार ३६४ मतदान केन्द्रमा मतदान अधिकृतसहितका कर्मचारी आइतबार पुगिसकेका छन् । उनीहरुले निर्वाचन आचारसंहिता पालना भएनभएको समेत अनुगमन गर्ने आयोगले जनाएको छ ।
बर्खाको समय भएकाले मतदान केन्द्र र मतपत्रको सुरक्षाका लागि आवश्यक सामग्री समेत पठाउँदै बर्खाको ख्याल गरेर काम गर्न कर्मचारीहरुलाई निर्देशन दिइएको छ । मतपेटिका छोप्न प्लास्टिक र खुला स्थानमा मतदान केन्द्र रहेका ठाउँमा टेन्टको व्यवस्था गरिनेछ ।
मधेसको आन्दोलनरत पार्टी राष्ट्रिय जनता पार्टी (राजपा)ले निर्वाचनमा अवरोध नगर्ने जनाइसके पनि नेत्रविक्रम चन्द विप्लव नेतृत्वको माओवादीबाट कतैकतै अवरोध हुन सक्ने अनुमान गरिएको छ । अवरोध हुनसक्ने स्थानमा सुरक्षा व्यवस्था थप सुदृढ पारिएको आयोगले जनाएको छ ।
निर्वाचन कानुनअनुसार सोमबारबाट निर्वाचन हुने क्षेत्रमा चुनावी प्रचारप्रसारमा समेत रोक लगाइएको छ । यस मौन अवधिमा राजनीतिक दल, उम्मेदवार वा समर्थकले कुनै प्रकारको चुनावी प्रचारप्रसार गर्न पाउँदैनन् । निर्वाचन हुने दिनभन्दा ४८ घण्टापूर्वबाट मौन अवधि सुरु हुन्छ ।