काठमाडौंः अन्तर्राष्ट्रिय व्यापारमा नयाँ रेकर्ड कायम हुँदै चालु आर्थिक बर्षको पहिलो ११ महिनामा आठ खर्ब ९३ अर्ब १० करोड रुपियाँको सामान आयात भएको छ । निर्यात भने त्यसको १३ दशमलव ३ गुण कम अर्यात ६७ अर्ब ३६ करोड रुपियाँमा सीमित रहेको छ ।
अन्तर्राष्ट्रिय व्यापारमा विशेषगरी भारतसँग रहेको ठूलो व्यापार असन्तुलन कम गर्ने कुरा नीति निर्माण तहदेखि निजी क्षेत्रसम्मले निकै धेरै गर्दै आए पनि व्यापार घाटा र आयात–निर्यात अन्तर भने अस्वाभाविकरुपमा बढदै गएको छ । व्यापार घाटा कम गर्ने अधिकांश औजारहरु असफल भएका छन् ।
वैदेशिक व्यापारमा रहेका लाखौं नेपाली युवाहरुले पठाएको विप्रेषणभन्दा बढि रकम सामान आयातमा बाहिरिन थालेको छ । गएको ११ महिनामा नेपालको कुल वैदेशिक व्यापारको घाटा अघिल्लो बर्षको सोही अवधिभन्दा ३० दशमलव ३ प्रतिशतले बढेर आठ खर्ब २५ अर्ब ७४ करोड रुपियाँ पुगेको छ ।
कुल व्यापारमा निर्यात र आयातको योगदान क्रमशः सात प्रतिशत र ९३ प्रतिशत रहेको छ । एघार महिनामा निर्यात ५ दशमलव ८ प्रतिशतले बढदा आयात भने २८ दशमलव १ प्रतिशतले बढेको छ । यस अवधिमा भारतसँगको मात्रै व्यापार घाटाको अंश ६५ प्रतिशत रहेको छ भने चीनसँगको १२ दशमलव ३ प्रतिशत छ ।
गएको ११ महिनामा टर्कीतर्फ पोलिष्टर यार्नको निकासी ९० प्रतिशतले बढेर तीन अर्ब ५१ करोडको भएको निकासी तथा व्यापार प्रवद्र्धक केन्द्र तथ्यांकमा उल्लेख छ । तर, ऊनी गलैंचाको निर्यातमा ८ दशमलव ३ प्रतिशतले ह्रास आई छ अर्ब ७३ करोडमा सीमित भएको भने तयारी पोशाकको निर्यात ९ दशमलव ७ प्रतिशतले ह्रास आई चार अर्ब ७२ करोडमा सीमित भएको छ ।
यता आयातमा भने फलाम तथा स्टीलको आयात ३३ प्रतिशतले वृद्धि भई ९३ अर्ब ६५ करोड, पेट्रोलियम पदार्थ ८८ दशमलव १ प्रतिशतले वृद्धि भई एक खर्ब १२ अर्ब २ करोड, यातायातका साधन र पार्टपुर्जा ३० दशमलव ५ प्रतिशतले वृद्धि भई ७३ अर्ब ७२ करोड, इलेक्ट्रिक र इलेक्ट्रोनिक सामग्री १७ दशमलव ४ प्रतिशतले वृद्धि भई ३५ अर्ब ४१ करोड पुगेको छ ।
