काठमाडौंः केही दिनअघि नेपाल भ्रमणमा रहेकी भारतीय विदेश मन्त्री सुश्मा स्वराजसँग नभेटेका एमाले अध्यक्ष केपी ओलीले चिनियाँ उपप्रधानमन्त्री वाङ याङसँग गोप्य वार्ता गरेका छन् । ओली र याङबीच मंगलबार सोल्टी होटलमा आधा घण्टा गोप्य वार्ता भएको हो ।
अन्य नेताहरुसँग सामुहिक वार्ता गरेका याङले ओलीसँग गोप्य गर्नुलाई धेरै अर्थपूर्णरुपमा लिएका छन् । केही हप्ताअघि चीनको तिब्बत भ्रमणमा गएका ओलीले नेपाल र चीनबीचको नाकाहरु सञ्चालन तथा अन्तरदेशीय प्रसारणलाइन निर्माण गर्ने विषयमा समेत कुराकानी गरेर आएका थिए ।
पछिल्लो समयमा भारतसँग टाढिँदै र चीनसँग नजिकिँदै गएका ओली र याङबीचको वार्तामा केही महत्वपूर्ण राजनीतिक तथा आर्थिक विषयमा कुराकानी भएको हुनसक्ने अडकल गरिएको छ ।
संविधानसभाले संविधान घोषणा गरेपछि त्यसप्रति असन्तुष्टि जनाउँदै भारतले नाकाबन्दी लगाएको चीनसँग नजिकिएका ओलीले चीनबाट इन्धन आपूर्ति गर्न, रेलसेवा सञ्चालन गर्ने लगायतका विषयमा सम्झौता गरेका थिए ।
संविधान संशोधन र संघीयताका विषयमा एमालेले लिएको अडानका प्रभाव स्थानीय निकायको निर्वाचनमा समेत परेको छ भने चीनसमेत एमालेसँग नजिकिएको छ । ओलीसँगको भेटमा चिनियाँ नेताहरुले दक्षिण एसियाको राजनीतिलाई केन्द्रमा राखेर छलफल गर्ने सहमति जनाएका छन्।