काठमाडैंः अविरल बर्षापछि आएको बाढीका कारण पीडित बनेका तराईबासीहरुका लागि धुर्मुस सुन्तली फाउण्डेशनले एकीकृत नमुना बस्ती निर्माण गर्ने अन्तिम तयारी गरेकोे छ । संस्थाले रौतहटमा एकीकृत नमुना सन्तपुर बस्ती निर्माण गर्न लागेको हो ।
यसअघि बाढी पीडितहरुकोक उद्दार र राहत वितरणमा सक्रिय रहेका कलाकारद्धय सीताराम कट्टेल (धुर्मुुस) र कुञ्जना घिमिरे (सुन्तली) अब उनीहरुका लागि एकीकृत नमुना वस्ती निर्माणमा जुटेका हुन ।
उनीहरुले यसअघि भूकम्प पीडितका लागि काभ्रे र सिन्धुपाल्चोकमा तथा महोत्तरीका गरिव मुसहर समुदायका लागि नमुना वस्ती निर्माण गरेर प्रसंशा बटुल्न सफल भएका छन् ।
फाउण्डेशनले अहिले बनाउन लागेको नमुना वस्ती रौतहटको चन्द्रपुर नगरपालिकाका माझी, दुसाद, लोहार, मुसहर र हजाम जातिहरुको बसोवास रहेको ठाउँमा हो । गरिवीको चपेटामा रहेका उनीहरुलाई सहयोगका लागि वस्ती निर्माण गरिदिन लागेको फाउण्डेशनले जनाएको छ ।
फाउण्डेशनले जनाएअनुसार बस्ती निर्माणमा अनुमानित पाँच करोड ७५ लाखमा रुपियाँ लागत लाग्ने छ । बाढी पीडितहरुका लागि निर्माण गर्ने यस बस्तीका लागि सहयोग गर्न संस्थाले आग्रह पनि गरेको छ ।