काठमाडौंः साताको पहिलो दिन सेयर बजार परिसुचक नेप्से आइतबार १७ दशमलव ६३ अंकले बढेर एक हजार ५४८ अंक कायम भएको छ । गएको साताको अन्तिम दिन बिहीबार ३७ अंकले बढेको नेप्सेको वृद्धि यो साता पनि कायम रहेको हो ।
सामान्यतया साताको पहिलो दिन सेयर कारोबार राम्रो भए त्यो साताभर नै सकारात्मक हुने अनुमान गरिन्छ । गएको दुई महिना निरन्तर ओरालो लागेको सेयर बजारमा पछिल्ला दिनमा आएको सुधारले विशेषगरी सर्वसाधारण लगानीकर्तामा आशा र राहत मिलेको छ ।
आज कारोबार रकममा पनि सुधार आइ ७७ अर्ब ८० करोड रुपियाँको सेयर किनबेच भएको थियो । गएको बिहीबार यो कारोबार ६३ करोडमा सीमित थियो । बजार निरन्तर ओरालो लागेपछि लगानीकर्ता पर्ख र हेरको स्थितिमा रहेको बेला गत बिहीबारदेखि सुधार आएपछि कारोबार बढेको हो ।
दशैं नजिकिएको बेला एकाएक बजार घट्दै जानु र एक्कासी ३७ अंकले बढनुलाई विश्लेषकहरुले अस्वाभाविक र चलखेलको रुपमा व्यख्या गर्दै आएका छन् । आज पनि व्यापार समूहको उपसुचकमा आठ प्रतिशतभन्दा बढिको सुधार आएको छ भने त्यसपछि बाणिज्यको उपसुचक झण्डै दुई प्रतिशतले बढेको छ ।
होटल, वित्त र अन्य समूहले ओरालो लागे पनि विकास बैंक, जलविद्युत र बीमा समूहमा भने सामान्य सुधार आएको छ । आज नेपाल लाइफ इन्स्योरेन्स कम्पनीको संस्थापक सेयर एक्लैले १७ करोड ८५ लाख रुपियाँको कारोबार गरेको छ । त्यसपछि धेरै कारोबार त्यही कम्पनीको साधारण सेयर तीन करोड ८० लाख रुपियाँ रहेको छ ।
आज धेरै नाफा गर्नेमा बिशाल बजार कम्पनीका लगानीकर्ता अगाडि छन भने घाटा खानेमा मिथिला लघुवित्त विकास बैंकका लगानीकर्ता अगाडि छन् ।