काठमाडौंः पुल्चोकस्थित श्री लालीगुराँस बहुउद्देश्यीय सहकारी संस्थाले गएको आर्थिक वर्षमा सरकारलाई चार करोड ७१ लाख ९९ हजार ९६४ रुपियाँ राजश्व बुझाएको छ । समग्र सहकारी संस्थाहरुमा सरकारलाई यति धेरै राजश्व बुझाउने संभवतः आफू नै अग्रणी रहेको संस्थाको भनाई छ ।
संस्थाको १९औं बार्षिकोत्सवमा जारी विज्ञप्तिअनुसार यस संस्थाले आर्थिक बर्ष ०७२/०७३ मा छ करोड ६६ लाख ६९ हजार खुद मुनाफा आर्जन गरेकोमा आर्थिक बर्ष ०७३/०७४ मा सात करोड ७७ लाख १६ हजार खुद मुनाफा आर्जन गर्न सफल भएको छ । मुनाफामा यो १६ दशमलब ५७ प्रतिशतले वृद्धि हो ।
त्यसैगरी, लालीगुराँसको आर्थिक बर्ष ०७२/७३ को कूल कारोबार चार अर्ब ६२ करोड २९ लाख २० हजार रहेकोमा आर्थिक बर्ष ०७३/७४ मा छ दशमलव ६७ प्रतिशतले वृद्धि गरी कुल कारोवार पाँच अर्ब २३ लाख ९८ हजार रुपियाँ पुर्याएको छ । निक्षेपतर्फ आर्थिक बर्ष ०७२/७३ मा तीन अर्ब ९२ करोड ३४ लाख २२ हजार रहेकोमा आर्थिक बर्ष ०७३/७४ मा छ दशमलब ६७ प्रतिशतले वृद्धि भई चार अर्ब १८ करोड ५० लाख ५५ हजार पुगेको छ ।
कर्जा लगानीतर्फ आर्थिक वर्ष ०७२/७३ मा दुई अर्ब ९८ करोड ३१ लाख ५४ हजार रुपियाँ रहेकोमा आर्थिक बर्ष ०७३/७४ मा सात दशमलब ०१ प्रतिशतले वृद्धि भई तीन अर्ब १९ करोड २३ लाख ८० हजार पुगेको छ । शेयर पुँजीतर्फ ०७२/७३ को कुल शेयर पुँजी ३२ करोड चार लाख ५३ हजार रहेकोेमा आर्थिक बर्ष ०७/७४ मा १७ दशमलब १८ प्रतिशतले वृद्धि भई ३७ करोड ५५ लाख २० हजार रहेको छ ।
संस्थाका प्रमुख कार्यकारी अधिकृत सुरेन्द्र भण्डारीले आर्थिक विकासको मेरुदण्डको रुपमा रहेको सहकारीको समग्र विकासको लागि यस संस्थाले आगामी वर्षमा थप नयाँ योजनाहरुमा लगानी गर्दै जाने बताए । ललितपुरको चापागाँउ, काठमाडौंको चावहिल र भक्तपुरको कौशलटार गरी तीन वटा सदस्य सुविधा काउण्टर संचालन गरेको लालीगुराँस २०५६ भदौदेखि कारोबार सुरु गरेको हो ।
संस्थाले सामाजिक उत्तरदायित्व वहन गर्ने क्रममा मुख्य लगानीमा सञ्चालित श्री लालीगुराँस राष्ट्रिय उच्च माविमा अध्ययनरत गरिव तथा जेहेन्दार विद्यार्थीहरुलाई छात्रवृत्ति प्रदान गर्दै आइरहेको छ । त्यसैगरी संस्थाको मुख्य लगानीमा सञ्चालित लालीगुराँस हस्पिटलमा प्रत्येक महिनाको एक पटक निःशुल्क स्वास्थ्य शिविर संचालन गर्ने ब्यवस्था गरेको छ ।
सिन्धुपाल्चोकको लार्चामा तीन मेगावाटको भैरवकुण्ड हाइड्रोपावर लिमिटेड र चितवनको खैरहनीमा लालीगुराँस डेरी फार्म एण्ड रिसर्च सेन्टरमा सयौंको संख्यामा गाइपालन गरिरहेको लालीगुराँस सहकारी नेपालको ठूला सहकारीहरुमध्येको एक हो ।
