काठमाडौंः पति शेष घलेले विश्राम लिने भएसँगै श्रीमती जमुना गुरुङले गैरआवासीय नेपाली संघ (एनआरएनए)को अध्यक्षमा उम्मेदवारी दिने घोषणा गरेकी छन् । जमुनाले बिहीबार पत्रकार सम्मेलन गरी संघको नेतृत्वमा दावी प्रस्तुत गरेकी हुन ।
अष्ट्रेलियाका धनाढ्यहरुको सुचीमा रहेका शेष र जमुनाले नेपालमा समेत थुप्रै आर्थिक सामाजिक क्षेत्रमा योगदान दिइसकेका छन् । एनआरएनएको आठौं विश्व सम्मेलन तथा महाधिवेशन शनिबारबाट काठमाडौं सुरु गइरहेको बेला जमुनाले अध्यक्षमा उम्मेदवारी दिने घोषणा गरेकी छन् ।
अध्यक्षमा यसअघि हालका उपाध्यक्ष भवन भट्टले उम्मेदवारी घोषणा गरेका छन् भने कतारका नेपाली व्यवसायी टीबी कार्कीले यस पटक पनि उम्मेदवारी दिने समाचारहरु आइरहेका छन् ।
विश्वभरका नेपालीहरुको साझा संगठन एनआरएनएको यस पटकको सम्मेलनमा दुई हजारभन्दा बढि प्रतिनिधिहरु सहभागी हुँदैछन् । जमुनाले पत्रकार सम्मेलनमा भनिन, ‘विश्वभरीबाट आउनु भएका डेलिगेट्सहरुको आग्रह एवं गैरआवासीय नेपाली संघका मुख्य स्केटहोल्डरहरुको विश्वास र अपेक्षालाई निरन्तरता दिनुपर्ने आवश्यकतालाई ध्यान दिँदै मैले अध्यक्ष पदमा उम्मेदवारी दिने निर्णय गरेकी छु । मैले सबैको सहयोग पाउने विश्वास गरेकी छु ।’
उनले एनआरएनएले निर्माण गरिरहेका ठूला आयोजनाहरुलाई समयमै सम्पन्न गर्ने, ‘भिजन २०२० एण्ड बियोण्ड’को सफल कार्यान्वयन गर्ने बताइन । उनी अध्यक्षमा विजयी भइन भने संघको पहिलो महिना अध्यक्ष हुनेछिन ।
