चौध करोडको तरकारी बिक्री

तेह्रथुमः आर्थिक वर्ष २०७३/७४ मा जिल्लाबाट करिब १४ करोड रुपियाँ बराबरको तरकारी बिक्री गरिएको छ । बन्दागोभी, काउली, मुला, गोलभेँडा, रायो, बोडी, मटरलगायत तरकारी बिक्री गरिएको हो ।

सो आवमा किसानले कुल २७ हजार १३९ मेट्रिक टन तरकारी उत्पादन गरेका जिल्ला कृषि विकास कार्यालयका वरिष्ठ कृषि विकास अधिकृत रोहिणीराज घिमिरेले जानकारी दिए । चौध हजार २८३ मेट्रिक टन तरकारी जिल्लाबाहिर बिक्री गर्दा १३ करोड ८० लाख रुपियाँ भन्दा बढी रकम भित्रिएको घिमिरेले बताए । बाह्र हजार ८५६ मेट्रिक टन अर्थात् ४७ प्रतिशत तरकारी जिल्लामै खपत भएको थियो । जिल्लामा व्यावसायिक तरकारीखेती गर्ने किसानको संख्या थपिँदै गएको छ । किसानले खाद्यान्न बालीभन्दा तरकारी बालीबाटै मनग्य आम्दानी लिन थालेका छन् ।

किसनले दुई मुरी मकै फल्ने जमिनबाटै वर्षे र हिउँदे तरकारी खेतीबाट ५० हजार रपियाँ भन्दा बढी आम्दानी गर्न थालेका छन् । किसानको ध्यान थोरै मेहनत, कम लगानी र नगद आम्दानी भन्दै तरकारीखेतीतर्फ तानिएको घिमिरेले बताए । जिल्लामा ७३६ हेक्टर क्षेत्रफलमा वर्षे, ४७० हेक्टरमा हिउँदे र ४५० हेक्टरमा बेमौसमी तरकारीखेती हुने गरेको छ ।
गत आवमा किसानले ११ हजार ३९३ मेट्रिक टन वर्षे तरकारी उत्पादन गरेकामा एक हजार ७०८ मेट्रिक टनमात्रै जिल्ला बाहिर बिक्री गर्न पठाइएको कृषि कार्यालयले जनाएको छ । बेमौसमी तरकारी आठ हजार १०० मेट्रिक टन उत्पादन भएकामा दुई हजार २५ मेट्रिक टन मात्र जिल्ला बाहिर पठाइएको थियो ।

बेमौसमी तरकारीखेतीतर्फ किसान आकर्षित भएका कृषि कार्यालयका प्राविधिक सहायक भुवन बुढाथोकीले बताए । गत आवमा सात हजार ६४६ मेट्रिक टन हिउँदे तरकारी उत्पादन भएकामा एक हजार १४६ मेट्रिक टन जिल्लामै खपत भएको थियो । “तरकारी खेतीतर्फ किसानको आकर्षण बढ्दै गएको छ,” फुलेकका व्यापारी महेन्द्र पौडेलले भने । जिल्लामा बन्दाकोभी र काउलीको माग बढी रहेको उनको भनाइ छ ।

लालीगुराँस नगरपालिका–४, फुलेकका जगल काफ्ल तरकारीखेती गर्दा अन्य बालीभन्दा बढी आम्दानी हुने गरेको बताउछन् । “तरकारी खेती गरेरै वार्षिक १२ लाख देखि १५ लाख रुपियाँ सम्म आम्दानी हुन्छ ।” परम्परागत खेती छाडेर तरकारी खेती गर्न थालेपछि यहाँका किसानको आर्थिक अवस्था बलियो हुँदै गएको छ ।