काठमाडौंः सहरी विकास मन्त्री दिलनाथ गिरीले जलविद्युत्लाई राष्ट्रिय आम्दानीको मेरुदण्डका रुपमा स्थापित गर्ने सरकारको नीति रहेकाले यस क्षेत्रमा स्वदेशी तथा विदेशी लगानी प्रोत्साहन गर्न सरकारले लचिलो नीति लिएको बताएका छन् ।
नेपालमा जलविद्युत् विकासकर्तालाई उपकरण आपूर्ति गरिरहेको अष्ट्रियन कम्पनी एन्ड्रिज हाइड्रोले आयोजना गरेको ‘ग्राहक भेटघाट कार्यक्रम’को उद्घाटन कार्यक्रममा गिरीले नेपालमा जलविद्युत् विकासका लागि पनि अष्ट्रियन लगानीकर्ताहरुलाई आग्रह गरे ।
नेपालका लागि अष्ट्रियाकी राजदूत ब्रिगिट ओपिनिगर वाल्सफोरले जलविद्युत् स्वच्छ, नवीकरणीय उर्जाको स्रोत हुनुका साथै आम्दानीको स्रोत भएकाले नेपालले जलविद्युत् विकासलाई प्राथमिकतामा राख्नुपर्ने बताए । नवीकरणीय तथा स्वच्छ उर्जाले वातावरणीय प्रदूषण न्यूनीकरण गर्नुका साथै पेट्रोलियम पदार्थमाथिको निर्भरता घटाउन मद्दत गर्ने उनको भनाई छ ।
नेपाल विद्युत् प्राधिकरणका कार्यकारी निर्देशक कुलमान घिसिङले नेपालको कुल जलविद्युत् उत्पादन क्षमताको दश प्रतिशतभन्दा कम मात्र दोहन भएको बताए । उनले एन्ड्रिजका लागि नेपाल ठूलो बजार रहेको बताए । एन्ड्रिजले नेपालमा विगत दुई दशकदेखि उपकरण आपूर्ति गर्दै आएको छ ।
एण्ड्रिजका उपकरण गुणस्तरीय तथा आपूर्तिपछिको सेवा पनि विश्वसनीय रहेको दावी गरिएको छ । जलविद्युत् उपकरण आपूर्तिमा नेपाली बजारमा ठूलो हिस्सा ओगटेको एण्ड्रिजको उपकरण नेपालको सबैभन्दा उच्चक्षमताको जलविद्युत् आयोजना माथिल्लो तामाकोसी, चिलिमे, मध्यभोटेकोसीमा प्रयोग भएका छन् ।
अन्य निजी प्रवद्र्धकहरुले विकास गरेका आयोजनाहरुमा पनि एण्ड्रिजका उपकरण प्रयोग भएका छन् । घिसिङले अहिले विद्युत् खरिद सम्झौता भएर निर्माणको क्रमम तीन हजार पाँचसय मेगावाट क्षमताका तीनसय जति आयोजनाहरु रहेको बताए ।
प्रवद्र्धकहरुलाई विश्वासमा लिन गुणस्तरीय सामग्री आपूर्ति र बिक्री पछिको सेवालाई पनि चुस्त राख्न घिसिङको सुझाव थियो ।
नेपालका लागि कमर्सियल कन्सुलर ओस्कर एण्ड्सनरले एन्ड्रिजले नेपालमा बिसौं वर्षदेखि काम गर्दै आएको र अन्य अष्ट्रियन कम्पनीहरु पनि नेपालमा व्यवसाय गर्न इच्छुक रहेको बताए । नेपालमा अस्ट्रियन लगानी प्रवद्र्धन गर्ने उद्देश्यले पहिलो पटक ‘नेपाल—अस्ट्रिया इकोनोमिक फोरम’को आयोजना गरिएको उल्लेख गर्दै अन्य कम्पनीहरु पनि एन्ड्रिजजस्तै च्याम्पियन हुने आशा व्यक्त गरे ।
