काठमाडौंः कानुन व्यवसायीहरुले भ्रष्टाचारको मुद्दामा विशेष अदालतबाट दोषी ठहर भएका काँग्रेसका पूर्व सहमहामन्त्री गोविन्दराज जोशीले उम्मेदवारी दिन पाउने नपाउने विषयमा फरक फरक तर्क देखिएको छ ।
विशेष अदालतले दोषी ठहर गरेपछि सर्वोच्चमा पुनरावेदन गरेका जोशीको मुद्दा विगत पाँच बर्षदेखि टुङ्गो लाग्न सकेको छैन । विशेष अदालतले २०६९ साउन १० गते जोशीलाई डेढ बर्ष कैद र चार करोड ३२ लाख रुपियाँ बिगो जरिवाना सुनाएको थियो ।
कानुन व्यवसायी दिनेश त्रिपाठीका अनुसार विशेष अदालतले जोशीलाई भ्रष्टाचारी ठहर गरिसकेपछि सर्वोच्चको फैसला नआउँदासम्म त्यो नै अन्तिम हुने भन्दै जोशीले कुनै पनि हालतमा चुनाव लडन पाउँदैनन् ।
त्रिपाठी भन्छन– सर्वोच्चले भोलि जोशीलाई दोषी ठहर गर्ला वा नगर्ला छुट्टै कुरा हो । तर अहिले त उनी विशेष अदालतबाट दोषी प्रमाणित भई सजायसमेत सुनाइएका व्यक्ति हुन । सर्वोच्चले फैसला नगर्दासम्म विशेषले गरेको फैसला नै अन्तिम हो ।
निर्वाचनको अन्तिम नामावली प्रकाशन नभइसकेकाले निर्वाचन आयोगले जोशीको उम्मेदवारी रद्द गर्ने त्रिपाठीको ठोकुवा छ । उनले भ्रष्टाचारमा मुछिएका व्यक्तिलाई गलत व्याख्या गरेर चुनाव लड्न दिने हो भने त्यसले कानुनी राज्यको उपहास हुन्छ भन्दै विवादमा मुछिएकाहरुलाई कुनै पनि प्रोत्साहित गर्न नहुने बताए ।
नाम नबताउने शर्तमा तनहुँका एक कानुन व्यवसायीले भने सर्वोच्चको फैसला नआउँदासम्म जोशीलाई चुनाव लडन कानुनी बाधा नपर्ने तर्क गर्छन । उनी भन्छन– नैतिकरुपमा उहाँ (जोशी) आफै चुनाव लडन नहुने हो । तर कानुनले अन्तिम फैसला नआउँदासम्म आरोपी दोषी हुँदैन । पुनरावेदनमा नगएको भए विशेष अदालतको फैसला नै अन्तिम हुने थियो भन्दै उनले आफूले जोशीको पक्षमा नभई कानुनको व्याख्याको मात्रै कुरा गरेको बताए ।
मुद्दा मिलाइदिन राखेको शर्त देउवा र पौडेलले नमानेपछि बागी उम्मेदवारी
काठमाडौंः अदालतमा आफूविरुद्धको भ्रष्टाचारको मुद्दा खेपिरहेका काँग्रेसका पूर्व सहमहामन्त्री गोविन्दराज जोशीले उक्त मुद्दा मिलाइदिन काँग्रेस सभापति शेरबहादुर देउवा र वरिष्ठ नेता रामचन्द्र पौडेलसँग शर्त राखेको खुलासा भएको छ ।
देउवा र पौडेलले उनको शर्त नमानेपछि जोशीले तनहुँ क्षेत्र नं. १ मा पौडेलविरुद्ध बागी उम्मेदवारी दिएको देउवाका एक सहयोगीले बताए । उनले– जोशी दाईले मुद्दा नै मिलाएर आफूलाई भ्रष्टाचारको आरोपबाट मुक्त गर्न शर्त राख्नुभयो । समानुपातिक सुचीमा राखेर पछि साँसद बनाउँछौं भन्दा उहाँले मान्नुभएन । मुद्दा मिलाउने शर्त संभव थिएन । दाई ( शेरबहादुर)ले मान्नुभएन । त्यो भएपछि उहाँ रिसाएर निस्किनुभयो ।
काँग्रेसबाट प्रधानमन्त्रीको भावी उम्मेदवारको रुपमा प्रस्तुत भएका वरिष्ठ नेता पौडेलविरुद्ध पहिलेदेखि नै छापामार शैलीमा गालीगलौजा र आलोचनामा उत्रिँदै आएका जोशी पछिल्लो समयमा काँग्रेस नेता कृष्ण सिटौलासँग नजिकिएका छन् । गृह र शिक्षामन्त्री हुँदा कराडौं रुपियाँ भ्रष्टाचार गरेको आरोप खेप्दै आएका उनले भ्रष्टाचार गरेको रकम छोरोहरुमार्फत अष्ट्रेलिया र अमेरिका पठाएको आरोप लाग्दै आएको छ ।