काठमाडौंः हिमालय एअरलाइन्सले माल्दिभ्सको इक्वेटर भिलेज, अद्दु सिटीमा गत अक्टोबर २८ मा आयोजित दक्षिण एशियाली ट्राभल अवार्ड (साटा), २०१७ मा लिडिङ न्यू इन्टरनेशनल एयरलाइन्स–भिजिटर्स च्वाइस गोल्ड अवार्ड प्राप्त गरेको छ ।
दक्षिण एसियाली ट्राभल अवार्ड (साटा)द्धारा आयोजित उक्त महोत्सवमा गान अन्तर्राष्ट्रिय विमानस्थलकी महाप्रबन्धक इब्थिसमा अहमिद सइदले हिमालय एअरलाइन्सको ब्रान्ड तथा सेवा विभागकी प्रमुख उज्ज्वला दलीलाई उक्त अवार्ड प्रदान गरेकी हुन । उक्त अवार्ड प्राप्तिले आगामी दिनमा उड्डयन क्षेत्रमा सेवा अझ अभिवृद्धि गर्न थप उर्जा दिएको हिमालय एअरलाइन्सको भनाई छ ।
साटा दक्षिण एसियाका विभिन्न राष्ट्रका पर्यटन संगठनहरुद्धारा अनुवन्धित क्षेत्रीयस्तरको पहिलो अवार्ड हो । यसले यस क्षेत्रको सेवाको स्तर अभिवृद्धि गराउने लक्ष्य राखेको छ । उक्त अवार्ड छनोटका लागि अनलाइन भोटिङको प्रक्रिया अपनाइएको थियो । भोटिङको प्रक्रिया ३१ मे देखि ३१ अगस्टसम्म अनलाइनमार्फत खुल्ला राखिएको थियो ।
आवेदनमा हुने अनियमिततालाई न्युनीकरण गर्न प्रत्येक भोटरले भोट गर्नुअघि व्यक्तिगत विवरण दर्ता गर्ने नियम रहेको थियो । यसअघि ३० अगस्टमा एअरलाइन्सको टिमले अवार्ड कमिटिका निर्णायक टिम समक्ष एअरलाइन्सको सेवा, व्यवस्थापन, हवाई सुरक्षा आदि पक्ष समेटी प्रस्तुतिकरण गरेको थियो ।
