काठमाडौंः राष्ट्रपति विद्यादेवी भण्डारीले मुलुकको आर्थिक विकासका लागि हस्तकलाका सामग्रीको प्रवद्र्धनमा जोड दिएकी छिन् ।
नेपाल हस्तकला महासंघद्वारा भृकुटीमण्डपमा आजदेखि शुरु भएको १५ औँ संस्करणको हस्तकला मेला तथा १३ औं प्रतियोगितात्मक हस्तकला प्रतियोगिताको शुभारम्भ गर्दै उनले हस्ताकलाको विकासले मात्र देशको आर्थिक समृद्धि र गरिबी निवारणमा टेवा पुग्ने विश्वास व्यक्त गरिन ।
राष्ट्रपति भण्डारीले परम्परागत हस्तकलाका ज्ञान र सीपलाई प्रवद्र्धन गरी युवा पुस्तालाई यससम्बन्धी आकर्षण गर्न आवश्यक रहेकामा जोड दिँदै नेपाली हस्तकलाका सीप र कलाले अन्तर्राष्ट्रिय जगत्मा नेपालको पहिचानलाई उजागर गरेको छ भनीन् । सो अवसरमा उनले उत्कृष्ट हस्तकलाका निर्यातकर्तालाई प्रमाणपत्रसमेत वितरण गरेकी थिइन् ।
‘हस्तकला समृद्धिका सम्भावना’ नाराका साथ शुरु भएको प्रदर्शनीमा २५ जिल्लामा उत्पादन भएका हस्तकलाका सामग्री करिब २०० प्रदर्शनी कक्षमा राखिएका छन् । गत आवमा करिब १० अर्ब रुपियाँ बराबरको हस्तकलाका सामग्री निर्यात भएको थियो । करिब १५ अर्ब रुपियाँ लगानी रहेको यस क्षेत्रले ११ लाखलाई प्रत्यक्ष/अप्रत्यक्ष रुपमा रोजगारी दिएको छ ।
महासंघका अध्यक्ष धर्मराज शाक्यले सरकारले गरिबी न्यूनीकरणका लागि हस्तकलाको विकासमा जोड दिनुपर्छ भनिन् ।
नेपाल उद्योग वाणिज्य महासंघका कार्यबाहक अध्यक्ष शेखर गोल्छाले नयाँ पुस्तालाई हस्तकलाको व्यापारमा आकर्षित गराउन आवश्यक रहेकामा जोड दिनुभयो । विसं २०४८ देखि हस्तकला महासंघले नेपाली हस्तकलाको बजार विस्तार तथा प्रवद्र्धन गर्न यस किसिमको प्रदर्शनी आयोजना गर्र्दै आएको छ ।
