काठमाडौंः प्रधानमन्त्री एवं काँग्रेसका सभापति शेरबहादुर देउवाले ओम अस्पतालमा उपचार गराइरहेका काँग्रेस नेता विमलेन्द्र निधिलाई बुधबार बिहान भेटेर स्वास्थ्य अबस्थाबारे जानकारी लिएका छन् ।
देउवाले नेता निधिको शीघ्र स्वास्थ्य लाभको कामना गरे । आजै बिहान काँग्रेस महामन्त्री डा. शशांक कोइरालाले पनि निधिलाई भेटेर स्वास्थ्य अबस्थाबारे जानकारी लिएका थिए । पेटरोग विशेषज्ञ डा. राहुल पाठक र छाती रोग विशेषज्ञ डा. सुबोधसागर ढकाल लगायतको टोलीले निधिको स्वास्थ्य अवस्था हेरिरहेका छन् । चिकित्सकहरुले उनलाई केही दिन आराम गर्नुपर्ने बताएका छन् ।
धनुषा ३ बाट प्रतिनिधिसभा निर्वाचनको प्रत्यक्षतर्फका उम्मेदवार काँग्रेस नेता निधि कात्तिक १६ गतेको मनोनयन दर्तापछि चुनावी अभियानको क्रममा गृहजिल्ला धनुषामा बस्दै आएका थिए । त्यसक्रममा धुलोधुवाँका कारण केही असहज भएपछि उनी गत सोमबार राजधानी आएर अस्पताल भर्ना भएका हुन ।