व्यवसायीको बधाईको सिजन सुरु, चेम्बर पुग्यो ओली निवास बालकोट

chamber-kp-oli

काठमाडौंः निर्वाचनलगत्तै ठूला वा बहुमत प्राप्त दलका नेतालाई भेटेर बधाई दिने, सरकार गठनलगत्तै प्रधानमन्त्रीदेखि सरोकारवाला मन्त्रीलाई बधाई दिने निजी क्षेत्रको शैली अहिले पनि प्रारम्भ भएको छ ।

विगतमा जस्तै यस पटक पनि नेपाल चेम्बर अफ कमर्शले त्यसको श्रीगणेश गरेको छ । चेम्वर अध्यक्ष राजेशकाजी श्रेष्ठ नेतृत्व टोलीले भावी प्रधानमन्त्रीको रुपमा परिचित र प्रतिनिधिसभा तथा प्रदेशसभा निर्वाचनमा सबैभन्दा ठूलो दलको रुपमा स्थापित एमाले अध्यक्ष केपी ओलीलाई भेटेर बधाई दियो ।

united_cement

यो बधाई दिने क्रम प्रधानमन्त्री नियुक्तिदेखि मन्त्रीहरु बन्दासम्म जारी रहने छ । चेम्बरको टोलीले बुधबार ओली निवास बालकोटमा पुगेर प्रतिनिधि र प्रदेशसभाको निर्वाचनमा वामगठबन्धनले पूर्ण बहुमत ल्याएकोमा बधाई टक्र्याएको हो ।

टालीमा सहभागीहरुले बहुमतको सरकार बनेसँगै संक्रमण कालको अन्य भई स्थिर सरकार बनेर आर्थिक बिकास हुने बताए । चेम्वर अध्यक्ष श्रेष्ठले स्थिर सरकार गठनसँंगै मुलुकले आर्थिक समृद्धि हासिल गर्ने विश्वास व्यक्त गरे । मुलुकको आर्थिक समृृद्धिका लागि स्थायी सरकारको महत्वमाथि चर्चा गर्दै उनले अब बन्ने स्थायी सरकारले मुलुकको आर्थिक बृद्धि गर्न महत्वपूर्ण भूमिका खेल्ने बताए ।

देश संघीय संरचनामा गएसँंगै राज्य सञ्चालनका लागि धेरै खर्च आवश्यक पर्ने भन्दै त्यसका लागि आवश्यक सबै स्रोत उद्योगी व्यवसायीहरुसँंगको करमा मात्रै भर पर्न नहुने सुझाव दिए । श्रेष्ठले यसका लागि अन्य आम्दानीको स्रोत पनि खोज्नुपर्ने बताए ।

उनले छिमेकी मुलुक भारत र चीन दुवै देशलाई समदुरीमा राखेर अगाडि वढ्नुपर्नेसमेत सुझाव दिन भ्याए । प्रतिउत्तरमा ओलीले अबको एजेन्डा नै आर्थिक हुने भन्दै लगानीमैत्री वातावरण तयार पारी मुलुकको आर्थिक विकासलाई अगाडि बढाउने बताए ।

उनले करको अन्तिम भार जनतामा नै पर्ने भएकाले जनतालाई अधिक कर नबोकाउने बताए । आजै नेपाल उद्योग बाणिज्य महासंघको अर्को टोली पनि बालकोट पुगेर ओलीलाई बधाई दिएको छ । बधाईका लागि उनीहरुले यसअघि नै समय मागे पनि ओलीलाई आजलाई समय दिएका हुन ।

राजनीतिक वा सरकारी तहबाट नीति तथा कार्यक्रममा छलफल गर्न बोलाउँदा जानु स्वाभाविक भए पनि चुनाव जित्ना साथै र मन्त्री तथा प्रधानमन्त्री हुना साथै हतारिएर हरेक पटक लाभालस्कर जानुमा बढी चाकडी देखिने गरेको छ ।