काठमाडौंः नेपाल घरेलु तथा साना उद्योग महासंघको आयोजनामा आउँदो बैशाख १४ गतेदेखि १४ औं अन्तर्राष्ट्रिय औद्योगिक व्यापार मेला तथा घरेलु उद्योग महोत्सव–२०७५’ आयोजना हुने भएको छ ।
आयात प्रतिस्थापन र निर्यात प्रवद्र्धनका लागि लघु, घरेलु तथा साना उद्योगको विकास गर्ने उद्देश्यका साथ हरेक बर्ष आयोजना गरिँदै आएको यस किसिमको महोत्सव यस बर्ष वैशाख तेस्रो सातामा गर्न लागिएको हो । यो महोत्सव पाँच दिनसम्म भृकुटीमण्डपमा चल्नेछ ।
यस बर्षको महोत्सवको नार ‘नेपाली वस्तु प्रयोग गरौं, नेपाली भएकोमा गर्व गरौं’ र ‘उद्योग गरौं, उद्यमी बनौं, उठाऔं नेपाल’ तय गरिएको छ । हालै सम्पन्न प्रतिनिधिसभा र प्रदेशसभा निर्वाचनपछि मुलुकमा स्थायी सरकार बन्ने र मुलुकमा राजनीतिक स्थिरतासँगै आर्थिक संवृद्धिलाई अघि बढाउने संभावना बढेको बेला यस महोत्सवले ठूलो महत्व राख्ने महासंघका अध्यक्ष श्याम गिरी बताउँछन् ।
उनले झण्डै तीन लाख लघु, घरेलु तथा साना उद्योगहरुलाई प्रदर्शनीमार्फत प्रतिबिम्बित गरिने बताए । गिरीले नेपालको औद्योगिक तथा निर्यातमा समेत महत्वपूर्ण योगदान दिँदै आएको लघु, घरेलु तथा साना उद्योग क्षेत्र आर्थिक समृद्धिकाको आधार भए पनि राज्यबाट उचित संरक्षण र सहयोग पाउन नसकेको भन्दै प्रविधि प्रयोग र अन्य क्षमता विकासका हिसाबले यस्ता उद्योगहरु प्रतिस्पर्धी बन्न नसकेको बताए ।
नयाँ प्रविधिको प्रयोग र व्यवसायी एवं कामदारहरुको क्षमता विकास गर्न सके यस्ता उद्योगहरुले आकर्षक प्रतिफल दिनसक्ने भन्दै धेरैजसो परम्परागतरुपमा चल्दै आएका यस्ता उद्योगहरुमा आकर्षण घट्दै जाँदा पुस्ता हस्तान्तरण हुन नसकिरहेको बताए ।
यस पटकको प्रदर्शनीमा नेपालका ७५ वटै जिल्लाका उद्यमीहरू, प्रविधि प्रयोगकर्ताहरू र भारत, पाकिस्तान, बंगलादेश लगायत सार्क मुलुक तथा चीनको सहभागिता रहने छ । कुल २५० स्टलको व्यवस्था हुने यस महोत्सवलाई दुई लाख भन्दा बढीले अवलोकन गर्ने र पाँच करोड भन्दा बढीको प्रत्यक्ष कारोबार हुने अनुमान गरिएको छ ।