अटेर गर्ने विमान कम्पनी धमाधम बक्यौता तिर्दै

Advertisement

काठमाडौंः सरकारले कारबाही गर्ने चेतावनी दिएपछि बक्यौता तिर्न अटेर गर्दै आएका कतिपय विमान कम्पनीले धमाधम रकम तिर्न थालेका छन् ।

संस्कृति, पर्यटन तथा नागरिक उड्डयन मन्त्रालयले रकम नतिर्ने विमान कम्पनीलाई उडान र अवतरण रोक्ने चेतावनी दिएपछि उनीहरुले किस्ताबन्दीमा रकम तिर्न थालेका हुन् ।

धेरै बक्यौता रहेको मलेसियन विमान कम्पनी एयर एशियाले मात्रै गत आइतबार नेपाल नागरिक उड्डयन प्राधिकरणलाई दुई करोड रुपियाँ बुझाएको छ । एयर एशियाले यात्रुसँग उठाएको सेवा शुल्कसँगै विमानस्थललाई रकम तिर्न अटेर गर्दै आएको थियो ।

प्राधिकरणका उपमहानिर्देशको नेतृत्वमा छानबिन समिति गठन गरेर बक्यौता तिर्न अटेर गर्ने कम्पनीलाई कारबाहीको तयारी गरेपछि धमाधम बोर्ड र प्राधिकरणलाई बुझाउनुपर्ने रकम तिर्न थालेका छन् । प्राधिकरणका प्रवक्ता वीरेन्द्रप्रसाद श्रेष्ठले लगातारको ताकेता र कारबाहीको चेतावनीपछि अटेर गर्दै आएका विमान कम्पनी धमाधम बक्यौता तिर्न थालेको बताए ।

एयर एशियाले प्राधिकरण र बोर्डलाई किस्ताबन्दीमा रकम तिर्दै जाने प्रतिबद्धता जनाएको छ । कम्पनीले नेपाल पर्यटन बोर्डलाई ५२ लाख ५० हजार रुपियाँ तिरेको छ । यस्तै प्राधिकरणलाई पनि किस्ताबन्दीमा रकम तिर्ने भन्दै कम्पनी सम्पर्कमा समेत आएको छ ।

बोर्डका निमित्त निर्देशक रोहिणीप्रसाद थपलियाले बक्यौता रकममध्ये केही प्राप्त भएको जानकारी दिए । सो विमान कम्पनीले बोर्डलाई सात करोड २३ लाख रुपियाँभन्दा बढी रकम बुझाउन बाँकी छ । प्रतिपर्यटक एक हजार रुपियाँको दरले उठाएको रकम बोर्डलाई बुझाउनुपर्ने कानूनी व्यवस्था छ ।

हाल बन्द रहेको भारतीय विमान कम्पनी किंगफिसरको पनि बक्यौता छ । उक्त कम्पनी हाल सम्पर्कभन्दा बाहिर रहेको बोर्डले जनाएको छ ।

प्राधिकरणले बक्यौता तिर्न अटेर गर्दै आएका दुई दर्जन बढी वायु सेवा कम्पनीलाई समयमा नै रकम उपलब्ध गराउन ताकेता गरेको थियो । ताकेता गरेपछि केही विमान कम्पनीले बक्यौता रकम उपलब्ध गराएका छन् भने केहीले किस्ताबन्दीमा भए पनि रकम तिर्ने वचन दिएको प्राधिकरणले जनाएको छ ।

एयर एशियाको मात्रै २३ करोड रुपियाँ बक्यौता चुक्ता गर्न अटेर गर्दै आएको थियो । प्राधिकरणका अनुसार बक्यौता रकम नतिरे उडान बन्द गर्ने चेतावनी दिएपछि हालसम्म १२ करोड रकम रुपियाँ उपलब्ध गराएको छ । प्राधिकरणका अनुसार किस्ताबन्दीमा चुक्ता गर्ने सिम्रिक र सौर्य एयरलाइन्सले प्रतिबद्धता जनाएका छन् ।

छानबिन समितिको निर्देशनपछि त्रिभुवन विमानस्थलले मंसिर दोस्रो साता सार्वजनिक सूचना जारी गरी सबै वायुसेवालाई मंसिर मसान्तभित्र बक्यौता चुक्ता गर्न निर्देशन दिएको थियो ।

हाल सञ्चालनमा रहेका एयरलाइन्सले ६६ करोड ३९ लाख ४६ हजार रुपियाँ लरकम तिर्न अटेर गरेका छन् । सरकारी कार्यालय तथा संघसंस्थाले समेत ५५ करोड १२ लाख २१ हजार रुपियाँ तिरेका छैनन् । यस्तै, सञ्चालनमा नरहेका संघ र संस्था फार्मको दुई करोड ९७ लाख ५७ हजार रुपियाँ र सञ्चालनमा रहेका संस्थाको १२ करोड ४५ लाख ८३ हजार रुपियाँ बक्यौता देखिएको छ ।

त्रिभुवन विमानस्थल भन्सार कार्यालय, नेपाल वायु सेवा निगम कार्यालयले समेत बाँकी रकम तिरेका छैनन् । भन्सार कार्यालयले ५५ करोड १२ लाख २१ हजार रुपियाँ र निगमले ३२ करोड २१ लाख रुपियाँ नौ हजार तिरेका छैनन् । यी दुई सरकारी निकायबाट मात्रै विमानस्थललाई ८७ करोड ३३ लाख ३१ हजार रुपियाँ बक्यौता रकम प्राप्त हुन बाँकी छ । विमानस्थल कार्यालयले सञ्चालनमा नरहेका वायुसेवा कम्पनी र संघसंस्थाको रकम असुलीका लागि विमानस्थल कार्यालयले प्रक्रिया शुरू गरेको छ ।

बन्द भएकालाई बक्यौता उठाउन केन्द्रीय तहसिलको कार्यालयले प्रक्रिया अगाडि बढाएको छ । सञ्चालनमा रहेकालाई कारबाही गर्ने चेतावनी दिँदै बक्यौता उठाउन लागिएको छ ।

Advertisement

Advertisement

Advertisement