काठमाडौंः नेत्रविक्रम चन्द विप्लव नेतृत्वको नेकपा माओवादीले भारतीय नायक सलमान खानसहित केही भारतीय कलाकारको नेपालमा हुन लागेको कार्यक्रम असफल बनाउने घोषणा गरेको छ । सलमान नेपाल विरोधी भएको भन्दै विप्लव माओवादीले मदिराको प्रोमोशनका लागि दशौं हजारको टिकट बेचेर कार्यक्रम गर्ने कुरा आफूहरुलाई मान्य नहुने बताएको हो ।
विप्लव माओवादीसम्वद्ध अखिल नेपाल जनसाँस्कृतिक महासंघले सोमबार सलमानको कार्यक्रमविरुद्ध औपचारिकरुपमा वक्तव्य जारी गर्ने र त्यो गर्दा पनि कार्यक्रम स्थगित नगरिए आन्दोलनको घोषणा गर्ने जनाएको छ । महासंघका महासचिव खेम थपलियाले नेपाल र नेपालीहरुलाई दुःख पर्दा सहयोग गर्नुको सट्टा सहानुभूतिसमेत प्रकट नगर्नेहरुलाई ल्याएर नेपालमा कार्यक्रम गर्नुको कुनै औचित्य नरहेको भन्दै नेपाली कलाकारहरुलाई उपेक्षा गरेर नेपालविरोधीहरुलाई नचाउने कुरा आफूहरुलाई अमान्य रहेको बताए ।
उनले भने, ‘सलमान नेपाल र नेपालीको मायाका लागि आउन लागेका होइनन् । नेपाली कलाकारहरुलाई उपेक्षा गरेर विदेशीलाई करोडौं तिरेर राजधानीको मुटुमा नचाउने कुरा कुनै पनि नेपालीलाई मान्य हुँदैन । भूकम्पमा हजारौं नेपाली छटपटाएको बेला सहयोग गर्न इन्कार गर्नेलाई ल्याएर कार्यक्रम गर्ने कुराप्रति हाम्रो घोर आपत्ति छ ।’
बहुराष्ट्रिय कम्पनी कार्सबर्गको लगानी रहेको गोर्खा ब्रुअरीले आफ्ना वियरहरुको प्रवद्र्धनका लागि सलमानसहित आधा जर्दन भारतीय कलाकारलाई ल्याएर टुँडिखेलमा कार्यक्रम आयोजना गर्न लागेको हो । त्यसका लागि उसले सलानलाई मात्रै ११ करोड रुपियाँभन्दा बढि खर्च गर्न लागेको छ ।
नेपालका विवादास्पद व्यवसायी राजेन्द्र खेतानको समेत केही लगानी रहेको गोर्खा ब्रुअरीले कर नतिरेको विषयमा उक्त कम्पनी र कर कार्यालयलाई यही फागुन १५ गते सर्वोच्च अदालतले बोलाएको छ । यसअघि पनि उक्त कम्पनीले कर नतिरेपछि गोर्खा ब्रुअरीले खेतान ग्रुपको ३० प्रतिशत सेयर आफूले लिएर व्यवस्थापन समेत आफैले लिएको थियो । त्यसपछि चुडामणि शर्माको कर फच्र्यौट आयोगबाट ८७ करोड रुपियाँभन्दा बढि कर छुट लिएको थियो ।
विप्लव माओवादीले नेपालमा कर तिर्न नसक्नेले भारतीय कलाकारलाई करोडौं रुपियाँ तिरेर कसरी कार्यक्रम गर्न सक्छ ? भन्दै गोर्खा ब्रुअरीको नियतमाथि प्रश्न उठाएको छ ।
