काठमाडौंः दुबईबाट सुन अबैध रुपमा नेपाल ल्याएर विभिन्न स्थानमा तथा भारतमा लगेर बिक्री गर्ने गिरोहलाई प्रहरीले पक्राउ गरेको छ । दुबईबाट हेयर इलेक्ट्रोनिक आइरनमा सुन लुकाएर नेपाल ल्याउने गिरोहलाई सीआईबीले सोमबार पक्राउ गरेको हो ।
बिशेष सूचनाका आधारमा महाराजगन्जबाट खटिएको केन्द्रीय अनुसन्धान व्यूरोको प्रहरी टोलीले सोमबार तीन जनालाई पक्राउ गरेको जनाइएको छ । उनीहरुलाई प्रहरीले सिनामंगलबाट बा १६ च ३५१० नम्बरको कारमासहित शशिकला भण्डारी गुरुङ, सरोज केसी र होम बहादुर बुढाथोकीलाई पक्राउ गरेको हो ।
शशीकला भण्डारी गुरूङको श्रीमानले दुवईबाट सुन नेपालमा पठाउँदै आएका थिए । यसरी पठाईएका सुन कोटेश्वरस्थित बर्ज्राचार्य गहना प्रालिमा र शाक्य अर्नामेन्टमा बिक्री गर्ने गरेको खुलेपछि खानतलासी गर्दा गरगहना तथा गालिएको सुन बरामद भएको प्रहरीले जनाएको छ ।
पक्राउ भएका व्यक्ति र वरामद गरिएको सुनलाई प्रारम्भिक अनुसन्धान पश्चात थप अनुसन्धानको लागी राजश्व अनुसन्धान विभाग, हरिहर भवनमा बुझाईएको छ ।
