पर्साः देशकै प्रमुख भन्सार नाका वीरगन्जको व्यापार घाटा चालु आर्थिक वर्षको आठ महिनामा दुई खर्ब ५० अर्ब रुपियाँभन्दा बढी पुगेको छ ।
आर्थिक वर्ष २०७४/७५ को साउनदेखी फागुनसम्मको आठ महिनामा वीरगन्ज नाकाबाट दुई खर्ब ५८ अर्ब ९९ करोड ८८ लाख रुपियाँ मुल्यको विभिन्न मालवस्तु नेपाल भित्रिएको छ भने सात अर्ब ८० करोड ५३ लाख रुपियाँ मुल्यको नेपाली उत्पादन निर्यात भएको छ ।
गत आर्थिक वर्षमा वीरगन्ज नाकाबाट निर्यातको तुलनामा ३२ गुणा अर्थात् दुई खर्ब ५१ अर्ब १९ करोड ३४ लाख रुपियाँभन्दा बढीको वस्तु आयात भएको थियो ।
आव २०७३/७४ को तुलनामा आव २०७४/७५ मा वीरगन्ज नाकाबाट ४३ अर्ब रुपियाँभन्दा बढी मुल्यको वस्तु आयात भएको वीरगन्ज भन्सार कार्यालयले जनाएको छ । गत आवमा वीरगन्ज नाकाबाट दुई खर्ब १५ अर्ब ४६ करोड ८६ लाख रुपियाँ मुल्यको वस्तु आयात भएको थियो ।
चालु आवको सोही अवधिमा २० प्रतिशत बढी अर्थात् ४३ अर्ब ५३ करोड दुई लाख रुपियाँ मुल्य बढीको वस्तु आयात भएको कार्यालयका प्रमुख सेवन्त पोखरेलले जानकारी दिए ।
उनले वीरगन्ज नाकाबाट चालु आवको आठ महिनामा ३२ गुणाले आयातमा वृद्धि भएको छ भने, निर्यातमा २३ प्रतिशतले कमी आएको बताए ।
गत आवको साउनदेखि फागुनसममा १० अर्ब १० करोड २९ लाख रुपियाँको विभिन्न वस्तु निर्यात भएको थियो । चालु आवको सोही अवधीमा २२.७४ प्रतिशत अर्थात् दुई अर्ब २९ करोड ७५ लाख रुपियाँको वस्तु कम निर्यात भएको भन्सार प्रमुख पोखरेलले जानकारी दिए ।
नेपालमा उत्पादन भएका वस्तुको लागत खर्च बढी भएको कारण अन्तर्राष्ट्रिय बजारमा नेपाली उत्पादनले प्रतिस्पर्धा गर्न नसकेकाले निर्यातमा कमी आएको पोखरेलको भनाइ छ ।
आयात बढ्दै जानु र निर्यात घट्दै जानुको मुख्य कारण सरकारको व्यापार नीति उद्योग मैत्री नहुनु रहेको वीरगन्ज उद्योग बाणिज्य संघका अध्यक्ष ओमप्रकाश शर्माको भनाइ छ ।
उनले नेपाली उद्योगका लागि उपकरण तथा कच्चा पदार्थ आयात गर्दा करमा सरकारले कुनै सहुलियत नदिएको र भारतको तुलनामा नेपाली व्यापारीले महँगो व्याज दरमा ऋण लिनुपरेकाले अन्तर्राष्ट्रिय बजारमा नेपाली उत्पादनले प्रतिस्पर्धा गर्न नसकेको बताए ।
नेपाली उद्योगका लागि उपकरण तथा कच्चा पदार्थ आयात गर्दा सरकारले करमा छुट दिए तथा सस्तो दरमा बैंकबाट ऋण उपलब्ध गराए नेपाली उत्पादनको लागत खर्च कम हुनुको साथै हाल देखिएको व्यापार घाटालाई कम गर्न सकिने अध्यक्ष शर्माको भनाइ छ ।
