काठमाडौंः काठमाडौं महानगरपालिका वडा नं. ३१ स्थित आलोकनगरका महिलाहरुले आफ्नो टोल सरसफाईका लागि सुरु गरेको अभियान ५१औं हप्ता पुगेको छ । उक्त अवसरमा स्थानीय सान्तोना कलेजको आयोजनामा शनिबार विशेष कार्यक्रम आयोजना गरियो ।
मातृशक्ति सरसफाई समूहको नाममा आलोकनगरका महिलाहरुले अघि बढाएको उदाहरणीय अभियानमा कलेजले आफ्नो एक महिने सामाजिक कार्यको अन्तिम दिन सरसफाईमा सहभागीता जनाएको हो । आजको कार्यक्रममा कलेका विद्यार्थी र स्थानीय गरी १५० को सहभागिता रहेको थियो । सन्देशमूलक प्लेकार्ड र व्यानरसहित सहभागी उनीहरुले टोलको परिक्रमा गरेका थिए । सरसफाईबाट चार रिक्सा फोहर संकलन गरी व्यवस्थापन गरिएको अभियानकी संयोजक प्रमिला पौडेलले जानकारी दिइन ।
सरसफाइ सकिएपछि आयोजित कार्यक्रममा सधै फोहर जम्मा गर्न आउने श्रमिकहरुको सम्मान गरिएको थियो । साथै कलेजको सामाकि कार्यक्रमअन्तर्गत आयोजित विभिन्न प्रतियोगितामा विजेताहरुलाई पुरस्कार पनि प्रदान गरिएको थियो ।
कार्यक्रममा काठमाडौं महानगरपालिकाको वडा नं. ३१ का वडा सदस्य रमेश सत्यालले वाग्मति सफा गरेर मात्रै काठमाडौं सफा नहुने भन्दै काठमाडौं उपत्यकाका सबै स्थानीय निकायदेखि जिल्लावासीहरु सफाइ अभियानमा लाग्नुपर्ने बताए ।
उनले घरबाट निस्कने फोहरहरुलाई सडक छेउका पोलहरुमा राखिएका डस्विनहरुमा जम्मा गर्न, कुहिने र नकुहिने फोहरहरु छुट्टाएर कुहिने फोहरबाट तरकारी फलाउन सल्लाह पनि दिए ।
कार्यक्रममा मातृशक्ति समूहकी संयोजक पौडेल, कलेजका प्रधानाध्यापक, केपी खनाल, सरोज गिरीलगायतले सरसफाइको महत्वबारे बोलेका थिए ।