नयाँ दिल्लीः भारतमा रहेका प्रवासी नेपालीहरुले सीमा नाकाहरुमा आफूहरुलाई दिने गरेको दुःख बैंकिङ कारोबारमा भोग्नुपरेको समस्या समाधानका लागि पहल गर्न प्रधानमन्त्री केपी ओलीसँग आग्रह गरेका छन् ।
भारत भ्रमणमा रहेका ओलीसँग नयाँ दिल्लीस्थित नेपाली दूतावासमा भेट गर्दै प्रवासी नेपालीहरुले आफूहरुले भोग्नुपरेका समस्याहरु समाधान गर्न आग्रह गरेका हुन । नेपाली नागरिक रोजगारी, अध्ययन तथा व्यापारका लागि भारतका विभिन्न स्थानमा छरिएर रहेका छन् ।
प्रवासी नेपालीले आफूहरुलाई बैंकिङ कारोबार गर्न, रकम पठाउन समस्या हुने गरेको भन्दै यस्ता समस्याहरु समाधान भए आफूहरूलाई नियमित रूपमा काम गर्न, व्यापार गर्न र अध्ययन गर्नसमेत सहज हुने बताए ।
उनीहरुले नेपालमा बहुमतको स्थिर सरकार बनेकाले अब आर्थिक विकासमा ध्यान दिन प्रधानमन्त्री ओलीलाई सल्लाह पनि दिए । स्वदेशमा नै रोजगारीको अवसर प्राप्त भए विदेशी भूमिमा आउनु नपर्ने भन्दै उनीहरुले रोजगारीको अवसरहरु सिर्जना गर्न आग्रह गरे ।
प्रवासी नेपालीका प्रतिनिधि जुद्धबहादुर जिटीले प्रवासमा रहँदा नेपाली नागरिकले अनेकन हैरानी खेप्नु परेको, नेपालीको आफ्नो पहिचानसमेत नहुने अवस्था रहेको हुँदा स्वदेशमा नै फर्केर काम गर्ने वातावरण बनाउन आग्रह गरे ।
प्रवासी नेपालीका अर्का प्रतिनिधि कृष्णप्रसाद भट्टराईले नेपाली जनताको सुख–दुःख देखेको र आफैँले अनुभव गरेको हिसाबले पनि प्रधानमन्त्री ओलीको कार्यकालमा नेपालले नयाँ फड्को मार्ने विश्वास व्यक्त गरे । उनले प्रवासी नेपालीले निकै दुःख, पीडा भोग्नुपरेको भन्दै यस पटक सुखद सन्देश प्रवाह हुन्छ भन्नेमा आफू आशावादी रहेको बताए ।
रोजगारीको खोजीमा बाजुराबाट नयाँ दिल्ली आइपुगेका केशव रेग्मी पनि आगामी दिनमा स्वदेशमा नै रोजगारीको अवसर सिर्जना हुने र विदेशमा आउनु नपर्ने आशामा छन् । नेताहरुले चुनावमा मात्रै मतदाता सम्झने अवस्थाको अन्त्य गरी अरू समयमा पनि नेपाली नागरिकको दुःख पीडामा मल्हम लगाउने अवस्थाको सिर्जना होओस् भन्ने चाहना आफूहरुको रहेको उनले बताउ ।
नेपाल–भारत सीमा क्षेत्रमा नेपाली नागरिकले भारतीय सुरक्षाकर्मीबाट हैरानी भोग्नु परेको, आपराधिक प्रवृत्तिका नागरिकले लुटपाट गर्ने गरेको र रोजगारीमा रहेका नेपालीले स्वदेशमा पैसा पठाउन समस्या भएको जस्ता गुनासो उनीहरूले प्रधानमन्त्री ओलीलाई अवगत गराएका थिए ।
समस्या समाधानको पहल गर्छुः ओली
प्रधानमन्त्री केपी ओलीले नेपाली समुदायले भारतमा भोग्नु परेको समस्या समाधानका लागि पहल गर्ने प्रतिबद्धता जनाएका छन् । उनले पञ्चायतकालदेखि नै नेपाली समुदायको समस्याबारे आफू जानकार भएकाले समस्या समाधानका लागि पहल गर्ने बताए ।
आफू सद्भाव वृद्धि गर्न भारत भ्रमणमा आएको उल्लेख गर्दै ओलीले भारतका प्रधानमन्त्री नरेन्द्र मोदी र अरू उच्च अधिकारी सँगको भेटमा पनि नेपालीको समस्या समाधानका लागि छलफल गर्ने बताए ।
नेपालमा राजनीतिक स्थिरता कायम भएको र आर्थिक समृद्धिको युग शुरु भएकाले स्वदेशमा नै रोजगारीको अवसर सिर्जना गर्दै जाने सोचमा सरकार रहेको भन्दै उनले युवा शक्तिलाई स्वदेशमा नै रोजगारीको अवसर प्रदान गर्न वर्तमान सरकार प्रयत्नशील रहेको बताए ।