ओली चीन जान नपाउँदै मोदी आउने तयारी, नेपालीको फेरि मन जित्न विशेष सहयोग घोषणाको तयारी

काठमाडौंः भारतीय प्रधानमन्त्री नरेन्द्र दामोदर मोदी आगामी जेठ दोस्रो साता नेपाल आउने तयारी करिव निश्चित भएको छ । जेठ ११ गतेभित्र नेपाल आउने गरी भ्रमणको तयारी सुरु भएको छ । हिन्दुस्तान टाइम्सले मे ११ मा मोदीले नेपाल भ्रमण गर्ने जनाए पनि परराष्ट्र मन्त्रालयले भने मे २५ लाई भ्रमण मिति तोक्ने भइरहेको जनाएको समाचार अनलाइनखबर डटकमले प्रकाशित गरेको छ ।

भारतीय पक्षसँग भइरहेको सल्लाहअनुसार जेठ ११ वा त्यसकै एकदुई दिन अघिपछिलाई मोदीको नेपाल भ्रमणको तिथि तोकिनसक्ने संभावना रहेको परराष्ट्रका अधिकारीहरुले बताएका छन् । प्रधानमन्त्री केपी ओली भारत भ्रमणबाट फर्किएर चीन जान नपाउँदै मोदीले नेपाल भ्रमण गर्न लागेका हुन ।

united_cement

प्रधानमन्त्री ओलीले चैत २३ देखि २५ सम्म भारतको भ्रमण गरेका थिए । भारतबाट फर्किएलगत्तै उनी चीन भ्रमणमा निस्किने भने पनि ओलीको भ्रमण अझै तय हुन सकेको छैन । ओलीको चीन भ्रमणको चाँजो पाँजो मिलाउन परराष्ट्रमन्त्री प्रदीप ज्ञवाली चीन गए पनि उनको भ्रमण अझै अनिश्चित छ ।

ओलीलाई चीनसँग नजिकिन नदिन भरमजदुर प्रयास गर्दै आएको भारतीय प्रधानमन्त्री मोदीले चिनियाँ रेल काठमाडौं आउनुअघि नै रक्सौलदेखि काठमाडौंसम्मको रेल निर्माणको आश्वासन दिएका छन् । यसअघि जनकपुर जान नपाएका मोदी यस पटक भने जाने संभावना रहेको छ ।

पहिलो पटक नेपाल आउँदा हाइहाई भए पनि अघोषित नाकाबन्दीका कारण आलोचित बन्न पुगेका मोदी पुनः नेपाललाई सहायताको प्याकेज घोषणा गरेर नेपालीको मन जित्ने रणनीतिमा छन् । ओलीको भारत भ्रमणमै गर्ने भनिए पनि हुन नसकेको अरुण तेस्रो जलविद्युत आयोजनाको शिलन्यास यस पटक मोदी नेपाल आउँदा गर्ने करिव निश्चित भएको छ ।