काठमाडौंः एमाले नेता केशब बडालले एमाले–माओवादी केन्द्रबीचको एकता नहोस् भनेर केहीले दक्षिणकालीमा कालो बोका भाकल गरेको आरोप लगाएका छन् ।
शनिबार रिपोर्टर्स क्लबमा बडालले भने, ‘केही त एकता नहोस् भनेर दक्षिणकालीमा कालो बोका भाकल गर्ने काम समेत गरेका छन्, तर अब एकता हुँदैन कि भनेर आशंका नगर्न म यही मञ्चबाट आग्रह गर्दछु ।’
उनले पार्टी एकता भनेको कुरा केटाकेटीको खेलजस्तो नभएको तर्क गर्दै थपे, ‘पार्टीहरुबीच एकता हुनु र मोर्चा हुनु फरक कुरा हो ।’ स्थानीय तहदेखि केन्द्रसम्म एमाले र माओवादी केन्द्र हार्दिकताका साथ अघि बढेको उल्लेख गर्दै बडालले दुई पार्टीबीचको एकता छिट्टै हुने विश्वास दिलाए ।
फरक प्रसँगमा उनले वर्तमान प्रधानमन्त्री केपी ओलीको विरोध गर्नेहरु राम्रो गर्नेको विरोधी मात्रै भएको टिप्पणी गरे । उनले भने, ‘विगतमा कसैले पनि गर्न नसकेको काम प्रधानमन्त्री हुँदा केपी ओलीले गरेर देखाउनुभयो, मुलुकको राष्ट्रियता, अखण्डता, सार्वभौमिकता, स्वाधिनताको पक्षमा उहाँ दृढ हुनुहुन्थ्यो र अहिले पनि उहाँ दृढ नै हुनुहुन्छ, देशको स्वाभिमान उचो बनाउनुभयो ।’
भारत र चीन नेपालका लागि दुवै अनन्य मित्र रहेकोले दुवै देशसँग पारस्परिक रुपमा सम्बन्ध अघि बढाउन ओलीले महत्वपूर्ण भूमिका निर्वाह गरेको बडालको तर्क छ । उनले भने, ‘विगतमा नेपाल–भारतबीच कर्मचारीस्तरमा सम्बन्ध थियो । तर अहिले राजनीतिक तहबाटै सम्बन्ध अघि बढेको छ ।’
नेपालको राष्ट्रिय सुरक्षालाई ध्यानमा राखेर प्रधानमन्त्रीले राष्ट्रिय अनुसन्धान विभागलाई आफू केन्द्रित गरेका हुन भन्दै बडालले भने, ‘राष्ट्रिय सुरक्षा बलियो र दरो बनाउनको लागि, अक्षुण र अविछिन्न राख्नको लागि कार्यकारी प्रधानमन्त्रीले आफू मातहतमा अनुसन्धान विभाग राख्नु नौलो कुरो होइन् ।’
एमाले र माओवादी केन्द्रबीच एकताको लागि माओवादी केन्द्रका अध्यक्ष पुष्पकमल दाहाल प्रचण्डले त ५०÷५० को कुरा गर्नुभएको छ नि ? तपाईहरु के गर्नुहुन्छ भनेर सोधिएको अर्को प्रश्नमा नेता बडालले भने, ‘पार्टी एकता र मोर्चा एउटै कुरा होईन, एकता भनेको त पानी मिसाएजस्तो हुनुपर्छ।’
उनले महाधिवेशन अघि नै यो व्यक्ति अध्यक्ष भनेर ग्यारेण्टी गर्न नहुने धारण राखे । बडालले भने, ‘महाधिवेशनपछि लोकतान्त्रिक प्रक्रिया अनुसार जो पनि अध्यक्ष बन्न सक्छन्, प्रचण्ड योग्य र सक्षम हुनुहुन्छ, अहिले नै यो व्यक्तिलाई अध्यक्ष भनेर भन्नुहुँदैन ।’
ओली र प्रचण्ड दुवै नेताले ‘र्यांक एण्ड फाइल’ सबै कार्यकर्ता मेरा हुन भनेर अघि बढ्नुपर्नेमा उनको जोड थियो । बडालल एमाले र माओवादी केन्द्रबीच एकता ढिलाई हुँदा चिन्ता र खुशी मनाउने दुवै थरि मानिसहरु रहेको जनाए ।