काठमाडौंः अमेरिकाले आफ्नो देशमा अस्थायी रुपमा बसोबास गरी काम गर्दै आइरहेका करिब नौ हजार नेपाली नागरिकहरुको ‘टेम्प्रोररी प्रोटेक्स स्टाट्स’ (टीपीएस) नविकरण नगर्ने सम्भावना बढेको छ ।
उनीहरु भुकम्प प्रभावितको रुपमा अमेरिकामा अस्थायी रुपमा बस्दै श्रम गरिरहेका थिए । अमेरिकाले उक्त सुविधा नविकरण नगर्ने भएपछि त्याँहा रहेका नेपालीहरुले अरु सुविधा पाउनलाई निवेदन दिन पर्नेछ ।
यदी अन्य सुविधामा पनि बस्न नपाएमा उनीहरुलाई नेपाल फिर्ता पठाइनेछ । टीपीएस सुविधा नविकरण नभएमा अर्को १५ महिना भित्र टीपीएस सुविधा प्राप्त नेपालीले अर्को सुविधामा गइसक्न पर्ने हुन्छ ।
त्यस्तो नभए उनीहरुलाई स्वदेश फिर्ता गरिने समाचारमा उल्लेख गरिएको छ । तर, अहिलेसम्म टीपीएस सम्बन्धि निर्णय गर्ने आधिकारिक निकायले कुनै निर्णय गरेको छैन ।
तीन वर्षअघि नेपालमा गएको भूकम्प प्रभावितलाई ट्रम्प प्रसासन टीपीएस सुविधाको नविकरण नगर्ने पक्षमा रहेको अमेरिकाको चर्चित अनलाई समाचार साइट वासिंटन पोष्टले मंगलवार उल्लेख गरेको छ ।
साथै, उक्त सुविधामा अमेरिकामा अस्थायी रुपमा बस्दै आएको करिब नौ हजार नेपालीलाई डिपोर्टेशन (स्वदेश फिर्ता) गरिने पनि वासिंटन पोष्टले जनाएको छ ।
अमेरिकाले टीपीएस सुविधा पाएका नेपालीलाई देश छोड्न एक वर्षको समय दिइने र त्यसो नभए उनीहरुलाई देश निकाला गरिने जनाएको छ । तीन वर्ष अगाडी अमेरिकामा बस्न अस्थायी रुपमा नेपालीलाई दिइएको उक्त सुविधाको समय जुनमा सकिँदैछ ।