काठमाडौंः मेगा बैंकले चालु आर्थिक बर्षको नौ महिनामा ५२ करोड ४९ लाख रुपियाँ नाफा आर्जन गरेको छ । बैंकले पहिलो त्रैमासमा आठ करोड ११ लाख कमाएकोमा दोस्रो त्रैमासमा ३९ करोड ३६ लाख रुपियाँ कमाएको थियो ।
टुरिजम डेभलपमेन्ट बैंकसँग मर्जरको प्रक्रियामा रहेको मेगा बैंकको नौ महिनाको सञ्चालन मुनाफा एक अर्ब चार करोड रुपियाँ रहेको छ । बैंकले नौ महिनामा सञ्चालन मुनाफामा ५२ दशमलव ९७ प्रतिशत वृद्धि गरेको हो ।
बैंकले टुरिजमसँग मर्जर भएपछि वित्तीय आकार र सूचकहरु पनि थप सुदृढ हुने भन्दै मर्जरका लागि कम्पनी रजिष्ट्रारको कार्यालय र नेपाल राष्ट्र बैंकबाट त्यसको लागि अन्तिम स्वीकृति प्राप्त भइसकेको जानकारी दिएको छ । यथासिघ्र एकीकृत कारोबार गरिने मेगाले जानकारी दिएको छ ।
मेगा बैंककी प्रमुख कार्यकारी अधिकृत (सिइओ) अनुपमा खुन्जेलीले टुरिजमसँग मर्जर भएपछि मेगा बैंक पुँजीका आधारमा नेपालकै ठूलो बाणिज्य बैंक मध्येको एक बन्ने छ भन्दै बैंकको नेटवर्क र व्यापार पनि बढ्ने बताएकी छन् ।
उनी भन्छिन, ‘हाम्रो पहिलो प्राथमिकता मर्जर नै हो । संयुक्त कारोबारमा केही ढिलाई नभएको भए बैंकको नाफा तथा अन्य सूचकांकमा अझ सकारात्मक प्रभाव पर्ने थियो, अब मर्जरपछि बैंकले नयाँ गति पाउने छ ।’
