रुपन्देहीः अन्तर्राष्ट्रिय बौद्ध सम्मेलनको उदघाटन कार्यक्रम बहिस्कार गरेका प्रधानमन्त्री केपी ओली सोमबार बुद्ध जयन्तीको दिन भने लुम्बिनी आएर भाषणा गरेका छन् । प्रधानमन्त्रीले उदघाटन गर्ने तयारी गरिएको सम्मेलनमा ओली अन्तिम समयमा नआउने खबर पठाएका थिए ।
ओली नभएपछि पर्यटनमन्त्री रविन्द्र अधिकारीले सम्मेलनको उदघाटन गरेका थिए । १५ देशका मन्त्री र दुई दर्जन बढि मुलुकका विद्धानहरु सहभागी सम्मेलनमा ओली सहभागी नहुनुलाई अर्थपूर्णरुमपा लिइएको छ ।
पच्चीस सय ६२औँ बुद्ध जयन्तीको अवसरमा आज लुम्बिनीमा आयोजित कार्यक्रममा ओलीले यसलाई आकर्षक गन्तव्यको रुपमा विकास गरिने बताए । उनले यो ठाउँ हेर्दा पनि पवित्र, सुन्दा पनि पवित्र र सुगन्ध पनि पवित्र हुने ठाउँका रुपमा स्थापित गर्न चाहन्छौँ भन्दै लुम्बिनी वनलाई सुन्दर र बास्नादार ज्ञानले भरिपूर्ण प्राकृतिक सौन्दर्ययुक्त ‘मौरीको आहारा पाउने’ थलोका रुपमा विकास गर्ने बताए ।
कमजोरी, खराबी र विकृति हटाउने विषयलाई बुद्धले कहिल्यै स्वीकार नगरेको बताउँदै ओलीले भने, “अहिले पनि बुद्धका विचार सान्दर्भिक, महत्वपूर्ण र कालजयी छन् ।” बुद्ध लुम्बिनीमा जन्मेको विषयमा बहस गर्न नपर्ने उल्लेख गर्दै उनले बुद्धसँग सम्बन्धित देवदह, तिलौराकोट र रामग्राम क्षेत्रको विकास गर्न सरकार कटिबद्ध रहेको बताए ।
ओलीले थपे, “लुम्बिनी तीर्थस्थल, पर्यटकीयस्थल र अध्ययनस्थल मात्रै होइन, ज्ञानभूमि, तपोभूमि, देवभूमि पनि हो ।”
सो अवसरमा प्रधानमन्त्री ओलीले लुम्बिनी विकास कोषका उत्कृष्ट कर्मचारीहरुलाई सम्मान गरे । संस्कृति, पर्यटन तथा नागरिक उड्डयनमन्त्री रवीन्द्र अधिकारीको अध्यक्षतामा भएको उक्त कार्यक्रम राष्ट्रपति विद्यादेवी भण्डारीले उद्घाटन गरेकी हुन ।
