काठमाडौंः कृषि, भूमिव्यवस्था तथा सहकारीमन्त्री चक्रपाणि खनालले कृषि क्षेत्रमा रहेको सिण्डिकेट आफूले तोड्ने दावी गरेका छन् ।मंगलबार रिपोर्टर्स क्लबममा उनले भने, ‘कृषकहरुलाई फाइदा हुनेगरि म कदम चाल्छु, तरकारीमा रहेको सिण्डिकेट अब तोडिन्छ ।’
खनालले भने, ‘सिण्डिकेटबारे हामीले केही गर्नैपर्दैन् । कालिमाटी बजार अहिले जुनरुपमा रहेको छ, तीन पुस्तादेखि पुस्ता दर कब्जा गरिएको छ । त्यसलाई उत्पादन जसले गर्छ, त्यही किसानलाई दिने । कृषि मन्त्रालयले अनुदानमा केही गाडी उपलब्ध गराउने । किसानले सिधै पहिलो स्टेनशनबाट उठाएर उत्पादनहरु बजारमा ल्याउने गर्यो भने मलाई लाग्छ २० खरिद उपभोक्ताको ८० र बीचमा रहेको त्यो ४० के गर्ने ? भने सिण्डिकेट हटाउन त हटाउनैपर्छ । तर केही समय लाग्छ । सिण्डिकेट तोड्नैपर्छ ।’
आफूले कृषि क्षेत्रलाई ध्यानमा राखेर ‘किसान पेन्सन’ लगायत केही नयाँ कार्यक्रमहरु ल्याउने पनि उनले खुलासा गरे । खनालले भने, ‘किसान पेन्सन दिनुपर्छ । अनुदान दिनुपर्छ । गरिब परिचयपत्रलाई पनि अघि बढाउनुपर्छ । अहिले २६ जिल्लामा वितरण हुँदैछ ।’ उनले सिधै किसानको खातामा जानेगरि पेन्सन पठाउने व्यवस्था गरिने जनाए ।
उनले नेकपा एमाले र नेकपा माओवादी केन्द्रबीचको एकताबारे बाहिर भएजस्तो आशंका नरहेको स्पष्ट पारेका छन् । उनले भने,‘पार्टी एकताबारे अहिले बाहिर आशंका छ, तर हामी सबैखाले आशंका मेटाउँदै एकता हुन्छ ।’
