काठमाडौंः चालु आर्थिक वर्षको वैशाखसम्ममा ४१ देशहरुबाट २६२ परियोजनाका लागि ४९ अर्ब नौ करोड ६६ लाख रुपियाँको प्रत्यक्ष वैदेशिक लगानीको प्रतिवद्धता आएको छ । उद्योग विभागको पछिल्लो तथ्यांकअनुसार यस्ता लगानीको प्रतिवद्धता गर्नेमा सबैभन्दा अगाडि चीन छ ।
यस अवधिमा चीनको मात्रै ४३ अर्ब एक करोड रुपियाँको प्रतिवद्धता आएको छ । चीनले विभिन्न ९४ परियोजनाका लागि उक्त लगानीको प्रतिवद्धता जनाएको हो । त्यसपछि धेरै लगानीको प्रतिवद्धता जनाउनेमा भारत रहेको छ । तर, त्यो चीनको तुलनामा निकै कम छ । विभिन्न ३९ परियोजनामा भारतको चार अर्ब रुपियाँको लगानीको प्रतिवद्धता आएको छ ।
पछिल्लो सात महिनामा मात्रै ३८ करोड रुपियाँको लगानीको प्रतिवद्धतालाई विभागले स्वीकृत गरेको छ । संविधान निर्माण, बहुमतको सरकार निर्माणसँगै नेपालमा राजनीतिक र नीतिगत स्थिरता आउने देखिएसँगै लगानीको प्रतिवद्धता बढेको अनुमान गरिएको छ । वामपन्थी सरकार गठन भएसँगै चिनियाँ लगानी ह्वात्तै बढेको हुनसक्ने विश्लेषकहरुको भनाई छ ।
नयाँ बर्ष २०७५ लागेपछि मात्रै भण्डै १६ अर्ब रुपियाँको लगानीको प्रतिवद्धतालाई विभागले स्वीकृत गरेको छ भने गएको तीन महिनामा १८ मुलुकबाट ३८ अर्ब ६७ करोड रुपियाँको प्रतिवद्धता आएको छ ।
विगत पाँच बर्षको तथ्याङ हेर्दा आर्थिक बर्ष २०७१–७२ मा सबैभन्दा बढि ६७ करोड रुपियाँको प्रतिवद्धता आएकोमा पछिल्लो समयमा बढेको लगानीले यस बर्ष नयाँ रेकर्ड बन्नसक्ने संभावना देखिन्छ ।
लगानीको प्रतिवद्धता भए पनि नभित्रिएसम्म त्यसको सुनिश्चितता हुँदैन । लगानी भित्राउन र मुनाफा लैजाने नेपाल राष्ट्र बैंकको स्वीकृति लिनुपर्ने हुन्छ ।
