काठमाडौंः सञ्चार बचत तथा ऋण सहकारी संस्थाले लाखौं रुपियाँ ऋण लिएर बर्षौसम्म ऋण नतिर्ने गोरखापत्र संस्थान महाप्रवन्धक वसन्तप्रकाश उपाध्यायसहित आठ जनालाई तत्काल ऋणको सावाँ, ब्याज र हर्जना चुक्ता गर्न संस्थाले अल्टिमेटम दिएको छ ।
पत्रकारहरुको आर्थिक हितका लागि खोलिएको सो संस्थाले शनिबार विशेष साधारणसभा गरेर उपाध्यायसहित आठै जनालाई ऋण अशुलउपर गर्न कानुनी प्रक्रिया अघि बढाउने निर्णय गरेको हो । सहकारीको संशोधित कानुनअनुसार त्यस्ता संस्थाको ऋण नतिर्नेहरुलाई बैंकिङ कसुरमा कारवाही हुनसक्छ ।
संस्थाको विशेष साधारणसभाले ऋण लिएदेखि नै एक रुपियाँ साँवा ब्याज नतिर्ने आठ जना काला ऋणीहरुबाट ऋण अशुलउपर गर्ने भन्दै त्यसका लागि जेठ मसान्तसम्मको समय दिएको छ ।
सबैभन्दा बढि तीन लाख रुपियाँ ऋण लिनेमा टाइम कट्टेल छन भने गोरखापत्रका जिए उपाध्यायले दुई लाख रुपियाँ लिएका थिए । उपाध्यायले यस्ता थुप्रै व्यक्ति र संस्थाहरुबाट ऋण तथा सापटी लिएर नतिरेका समाचारहरु यसअघि पनि बेला बेलामा आउने गरेका छन् ।
त्यस्तै, टेलिभिजनकर्मी केदार कोइराला, तत्कालिन समयमा हिमालय टाइम्समा काम गर्ने सुरेन्द्र सुवेदी, विमर्स साप्ताहिकमा काम गर्ने प्रवल भट्टराई, खोटाङका कान्तिपुरका समाचारदाता डम्बर सिंह राई र अन्य दुई जनाको नाममा संस्थामा कुल १२ लाख रुपियाँ खराब कर्जा रहेको छ ।
झण्डै दुई सय श्रमजीवी पत्रकारहरुको लगानी रहेको यस संस्थाले ऋण तिर्न आउन पटक पटक लिखित तथा मौखिकरुपमा आग्रह गर्दा पनि उनीहरुले खटेर गर्दै आएको संस्थाका एक सदस्यले बताए ।
संस्थाले जारी गरेको विज्ञप्तिमाअनुसार काला ऋणीहरुबाट रकम अशुल गर्न पत्रकार शिवलाल न्यौपानेको अध्यक्षतामा पाँच सदस्यीय ऋण असुली उपसमिति गठन गरिएको छ । समितिको सदस्यमा लिलाराज खनाल, ज्ञानीप्रसाद अधिकारी, अधिवक्ता बाबुराम अर्याल, सदस्य सचिवमा अनामिका गिरी छन् ।
देशभर छरिएर रहेका पत्रकारकहरुको गर्जो र खाँचो टार्ने उद्देश्यले नौ बर्षअघि पत्रकार महासंघका पूर्व अध्यक्ष बिष्णु निष्ठुरीको संयोजकत्वमा सो संस्था स्थापना गरिएको थियो ।