काठमाडौंः अर्थविद् डा. मदन दाहालले ‘सुखी नेपाली– संवृद्ध नेपाल’ नाराको सट्टा ‘घरघरमा सीप पुर्याउँ, गरिवी हटाउँ’ नारा बनाउन प्रधानमन्त्री केपी ओलीलाई सल्लाह दिएका छन् ।
‘सुखी नेपाली– संवृद्ध नेपाल’को नारा सुन्दा कर्णप्रिय भए पनि उपयुक्त नरहेको भन्दै दाहालले व्यवहारमा उतार्नुपर्ने नारा ‘घरघरमा सीप पुर्याउँ, गरिवी हटाउँ’ रहेको बताएका छन् ।
उनले कृषि र उद्योगधन्दाको विकास नभएसम्म मुलुकको वास्तक विकास नहुने बताएका छन् । दाहालले कृषि र उद्योगको विकास नभएसम्म नेपाल जहिले विदेशी वस्तुको बजार कायम रहने भन्दै त्यस्तो हुँदा भन्सार महशुलको भरमा राजश्व परिचालन गर्नुपर्ने, मूल्यवृद्धिको चाप रहने र जनता शोषणमा पर्ने बताएका छन् ।
अर्थविद दाहालले हाम्रो सर्वोपरी प्राथमिकता धारामा पानी, गाउँमा सडक र स्वस्थ्य सेवा, गरिवलाई रोजगारी हो भन्दै रेल, पानी जहाज, केवलकार होइन भनेका छन् । उनले आत्मनिर्भर अर्थतन्त्रको विकास गर्दै यसलाई बाह्य अर्थतन्त्रसँग जोड्ने र आर्थिक विकासको प्रत्याभूति गर्ने उद्देश्यको बजेटमा हुनुपर्ने बताएका छन् ।
दाहालले महंगी नियन्त्रण गर्न प्रत्येक दिन बजारमा अधिकारसम्पन्न अनुगमन टोली खटाउनुपर्ने, राजधानी काठमाडौं र राजधानी बाहिर दिनको न्यूनतम् एक घण्टा खानेपानीको आपूर्ति गरिनुपर्ने, भत्केका सडक र पुलको यथासिघ्र मर्मत गरिनुपर्ने, फोहर हरेक दिन बिहान ७ बजेअघि उठाइसक्नुपर्ने, ट्राफिक जामको समस्या चाँडै समाधान गर्नुपर्ने सुझावसमेत उनले सामाजिक सञ्जालमार्फत सरकारलाई दिएका छन् ।
साथै, दाहालले शान्ति सुरक्षाको प्रत्याभूतिका लागि सशस्त्र प्रहरीबाट २४सै घण्टा पेट्रोलिङ हुनुपर्ने र भ्रष्टाचारीहरुलाई कडा कारवाही गरिनुपर्ने बताएका छन् । यस्ता कुराहरुमा सरकारले ध्यान दिए जनतालाई सरकार भएको अनुभूति हुने भन्दै उनले जनतालाई संवृद्धिको सपना बाँड्नुभन्दा अहिले सुःख शान्तिको प्रत्याभूति सरकारले गर्नुपर्ने बताएका छन् ।
