आउँदो वर्षदेखि एक हजार मेगावाट क्षमताका जलविद्युत आयोजनाको निर्माणकार्य सुरु

Advertisement

विराटनगरः प्रदेश नं १ का मुख्यमन्त्री शेरधन राईले प्रदेशमा रहेको नदीनालाबाट आगामी वर्ष एक हजार मेगावाट जलविद्युत उत्पादनका आयोजना सुरु गर्ने बताएका छन् ।

उनले संघीय सरकारले निर्माण गर्नेबाहेक प्रदेश सरकारले निजी क्षेत्र तथा विदेशमा काम गर्ने नेपालीको लगानीको आधारमा सरकारले जलविद्युत् आयोजना सञ्चालनका लागि आगामी निति तथा कार्यक्रममा समावेश गर्ने जानकारी दिए ।

राष्ट्रिय समाचार समितिका प्रदेश समाचारदातासँग आज कुरा गर्दै उनले प्रदेश सरकारको पहिलो प्राथमिकता कृषि नै रहेको र यसबाट प्रदेशलाई आत्मनिर्भर बनाई अन्य प्रदेशको आवश्यकता पूर्ति गर्ने र खाद्यान्नमा वैदेशिक आयात न्यूनीकरण गर्ने लक्ष्यका साथ कार्य उल्लेख गरे ।

मुख्यमन्त्री राईले सरकारको दोस्रो प्राथमिकता भनेको पर्यटन हो भन्दै यसबाट स्थानीय जनतालाई रोजगारी उपलब्ध हुनाका साथै तत्कालै नगद उपलब्ध हुने भएकाले यसले प्रदेश र मुलुकको विकास तथा समृद्धिमा बल पुग्ने धारणा व्यक्त गरे ।

उनले विराटनगर विमानस्थलका साथै क्षेत्रीय विमानस्थल विस्तार गर्ने कार्यमा प्रदेश सरकार दृढ रहेको बताउँदै यस क्षेत्रबाट छिमेकी मुलुक भारत, बंगलादेशका विभिन्न शहरमा उडान गरिने बताए ।

मुख्यमन्त्री राईले छिमेकी मुलुकतर्फको हवाई उडान तथा हिमाली क्षेत्रको उडानबाट छिमेकी मुलुक भारतको पश्चिम बंगाल, विहार, सिक्किमका साथै भुटान र बंगलादेशबाट धार्मिक तथा हिमाली पदयात्राका लागि आउने पर्यटकको बसाइँ अवधि तथा खर्च गर्ने रकम वृद्धिका लागि आवश्यक पूर्वाधार तयार गरिनेमा जोड दिए ।

उनले यस क्षेत्रमा कोशी टप्पु, रामधुनी, हेलेसी, बराहक्षेत्र, दन्तकाली, बुढासुब्बा, पिण्डेश्वरी महादेव, भेडेटार, नमस्ते झरान, नाम्जे, पाथिभरा लगायतका अन्य धार्मिक तथा पर्यटीय क्षेत्रमा भारतीय पर्यटकलाई आकर्षण गर्न निजी क्षेत्रको सहयोगमा प्रचारप्रसार र सेवा सुविधा उपलब्ध गराउन सरकार लागेको बताए ।

मुख्यमन्त्री राईले विदेशी धार्मिक पर्यटकको भ्रमणबाट विदेशी मुद्रा आर्जनका साथै मुलुकको व्यापार घाटा काम गर्ने कार्यमा प्रदेशको ठूलो सहयोग हुने विचार व्यक्त गरे ।

उनले यस प्रदेश रहेका ३५ वटाभन्दा बढी र आठ हजार मिटरभन्दा बढी उचाइका पाँचवटा हिमालको प्रचारप्रसार छिमेकी मुलुकमा गर्न निजी क्षेत्रको सहयोग लिने धारणा व्यक्त गरे ।

यहाँ रहेको सगरमाथा राष्ट्रिय निकुञ्ज, मकालु बरुण राष्ट्रिय निकुञ्ज, कोशी टप्पु वन्यजन्तु आरक्ष, कञ्चनजंघा संरक्षण क्षेत्र र गोक्यो ताल, र माइपोखरीको प्रचारप्रसार हुनसके पर्यटकको कमी कहिले नहुने उनले बताए ।

मुख्यमन्त्री राइले नीति तथा कार्यक्रममा प्रदेशका ५६ निर्वाचन क्षेत्रमा प्राविधिक शिक्षालय खोल्नाका साथै यसबाट तीन हजार बेरोजगार युवालाई रोजगारी उपलब्ध गराउने लक्ष्यका साथ सरकार हिँडेको जानकारी दिए ।

मुख्यमन्त्री राइले सरकारले प्रदेशको गौरवपूर्ण आयोजना पर्यटन, जलविद्युत् र खानीपानी पूर्वाधार निर्माणका लागि निजीलगायत बाह्य लगानी बढाउने धारणा व्यक्त गरे ।

उनले चिया, अलैँची, बेमौसमी तरकारी र फलफूल किसानका उत्पादन वृद्धिका लागि आवश्यक प्राविधिक, उन्नत बीउबिजन, मलखाद र सिँचाइको सुविधा उपलब्ध गराउने बताए ।

Advertisement

Advertisement

Advertisement