काठमाडौंः आफ्नो पेशामा ख्याती कमाएका वरिष्ठ न्यूरो सर्जन डा. उपेन्द्र देवकोटाको पार्थिव शरिरमा मंगलबार दिनभर विभिन्न क्षेत्रका व्यक्तिहरुले श्रद्धान्जली अर्पण गरेका छन् ।
श्रद्धान्जलीपछि देवकोटाको दिउँसो पशुपति आर्यघाटमा विद्युतीय शवदाह गृहमा उनको अत्येष्टि गरियो । देवकोटाको पार्थिव शरीरलाई छोरीहरुले बोकेका थिए । सोमबार अपरान्ह निधन भएका देवकोटाको पार्थिव शरिरलाई मंगलबार बाँसबारीस्थित न्यूरो अस्पतालमा श्रद्धान्जलीका लागि राखिएको थियो ।
दिनभर नै उनलाई श्रद्धाञ्जली दिन आउनेहरुको भीड अस्पतालमा थियो । देवकोटाका आफन्तदेखि उपराष्ट्रपति, सभामुख, पूर्वप्रधानमन्त्री, मन्त्री, पूर्वमन्त्री, दलका नेता तथा कार्यकर्ता, सेनापति, कलाकार, स्वास्थ्यकर्मी तथा अन्य शुभेच्छुकहरुले उनलाई श्रद्धान्जली दिएपछि अपरान्ह पशुपति आर्यघाटतर्फ अन्तिम दाहसंस्कारका लागि लगिएको छ ।
देवकोटाका बाल्यकालका साथी एवं पूर्वप्रधानमन्त्री डा. बाबुराम भट्टराई पनि श्रद्धान्जली दिन पुगेका थिए । विद्यालयमा सँगै अध्ययन गरेका देवकोटा र भट्टराई अध्ययनमा सबैभन्दा अगाडि आउन प्रतिस्पर्धा हुने गथ्र्यो । दिवंगत देवकोटाको शीरमा ढाकाटोपी लगाइएको छ । परिवारका अनुसार देवकोटाकै इच्छाअनुसार उनलाई ढाकाटोपी, दौरासुरुवाल र कोट लगाइएको हो ।
जण्डिसको जस्तो समस्या देखिएपछि स्वास्थ्य परीक्षण गर्दा देवकोटाको पित्तथैलीमा क्यान्सर देखिएको थियो । नेपालमा उपचार संभव नहुने देखिएपछि गत मंसिर ५ गते उनी बेलायतको किङ्स अस्पतालमा भर्ना भएका थिए । गत वैशाख १५ गते बेलायतमा उपचार गर्दागर्दै रोग निको नहुने थाहा पाएपछि उनी स्वदेशमै देह त्याग गर्ने इच्छाअनुसार नेपाल फर्केका थिए ।
जीवनको उत्तरार्धमा देवकोटाले पुर्खयौली घर र घर नजिकैको पँधेराको पानी खान इच्छा देखाएपछि उनलाई गोरखा लगेर ल्याइएको थियो । गोरखाबाट फर्र्किएको ९ दिनपछि देवकोटाको निधन भएको हो।
विसं २०१० पुस ४ मा जन्मिएका देवकोटाले २०३० सालमा भारतबाट एमबीबीएस उत्तीर्ण गरी वीर अस्पतालमा सेवा सुरु गरेका थिए । उनले नै २०३८ सालमा वीर अस्पतालमा न्युरो सर्जरी वार्ड स्थापना गराउन पहल गरेका थिए ।
न्युरो सर्जरीमा एफआरसीएस गर्न २०४० सालमा बेलायत प्रस्थान गरेका देवकोटाले सो विषयमा दक्षता हासिल गर्दै २०४७ सालमा स्वदेश फर्किएका थिए । उनी २०५९ सालमा केही समयका लागि स्वास्थ्यमन्त्रीसमेत भएका थिए ।
केही समय शिक्षण अस्पताल महराजगन्जमा प्राध्यापन सेवासमेत गरेका देवकोटाले नेपालमा स्नायुसम्वन्धी उपचारलाई उचाईमा पुर्याउन ठूलो योगदान दिएका थिए । सरल, स्वाभिमानी र देशभक्त स्वाभावका उनले पैसा कमाउन विदेशमै पलायन हुने काम गरेनन् ।
स्वास्थ्य मन्त्री हुँदा उनले चिकित्सा स्वास्थ्य विज्ञान प्रतिष्ठानको स्थापना गर्नुका साथै स्वास्थ्य बिमाको अवधारणालाई बहसमा ल्याउने काम गरेका थिए । उनले २०६२ सालमा बाँसबारीस्थित न्युरो अस्पतालको स्थापना गरेका थिए ।
[caption id="attachment_79186" align="aligncenter" width="900"]
[/caption]
