मस्कोः विश्वकप फुटबलको जारी २१औं संस्करणमा सशक्त टिमको रुपमा चिनिएका जर्मनीदेखि अर्जेन्टिना, स्पेन जस्ता टिमहरु पराजित हुँदै गएको बेला सोमबारको प्रिक्वाटरफाइनलको खेलमा पाँच पटकको विश्वकप बिजेता ब्राजिलले म्याक्सिकोको सामना गर्दैछ ।
उपाधि दावेदारीका लागि विश्व फुटबलमा नयाँ टिमहरु सशक्तरुपमा अगाडि बढिरहेको ब्राजिललाई मेक्सिकोले कडा चुनौति दिने देखिएको छ । यसअघि घरेलु मैदानमा त्यति राम्रो प्रदर्शन गर्न नसकेको ब्राजिल यस पटक छैटौं पटक विश्वकप जित्ने दाउमा छ ।
अहिलेसम्म उपाधि हासिल गर्न नसकेका नयाँ टिमहरु नयाँ जोश र नयाँ रणनीतिका साथ प्रस्तुत भइरहेको बेला ब्राजिललाई पनि मेक्सिको भारी पर्नसक्ने अनुमान कतिपयको छ । समूह चरणको खेलमा ब्राजिलले ७ अंकसहित अन्तिम १६ मा प्रवेश गरेको हो भने मेक्सिको ६ अंकसहित सोही चरणमा प्रवेश गरेकाले हो ।
समूह चरणको खेलमा एक खेलमा पराजित भए पनि दुई खेल जित्न सफल मेक्सिकोलाई कमजोर टिमको रुपमा लिन नमिल्ने अन्तर्राष्ट्रिय समाचार संस्थाहरुले जनाएका छन् । समूह चरणको खेलमा ब्राजिलले स्विट्जरल्यान्डसँग १—१ गोलको बराबरी तथा कोस्टारिकालाई २—० र सर्बियालाई २—० गोलले हराउँदै अघि बढेको हो ।
तर, आफ्नो पहिलो खेलमै साबिक विजेता जर्मनी जस्तो बलियो प्रतिद्वन्द्वीलाई १—० गोलले हराएपछि मेक्सिकोको मनोबल भने निकै उच्च बनेको छ । दोस्रो खेलमा एसियाली प्रतिद्वन्द्वी दक्षिण कोरियालाई २—० गोलले हराएको मेक्सिको समूहगत चरणको अन्तिम खेलमा भने स्विडेनसँग ०—३ गोलले पराजित भएको थियो ।
यस पटकको खेलमा अनपेक्षित परिणामहरु आएकाले पनि आज हुने ब्राजिल र मेक्सिकोको खेल कस्ले जित्छ ? सहजै अनुमान लगाइहाल्ने अवस्था छैन । अघिल्ला विश्वकपहरुमा चार पटक भिडिसकेका यी दुई टिम तीन खेलमा ब्राजिल विजयी भएको थियो भने एक खेल गोलरहित बराबरीमा सकिएको थियो । तर, अहिले मेक्सिकोले आफ्नो खेल्ने शैलीमा निकै परिवर्तन र सुधार गरिसकेको छ ।
बलियो रक्षापंक्तिका कारण पछिल्ला १४ खेलमा तीन गोलमात्र खाएको ब्राजिलसँग भिडन उच्च मनोबलका साथ मैदानमा उत्रिने तयारीमा मेक्सिनो छ । ब्राजिललाई कम्तिमा बराबरीमा रोक्न सकिएर पेनाल्टी सुटआउटबाट नतिजा निकाल्ने अवस्था सिर्जना भए नजिता आफ्नो पक्षमा आउने आशा मेक्सिकोको टिमको छ ।