काठमाडौंः सत्तारुढ दल नेपाल कम्युनिष्ट पार्टी (नेकपा)का नेतासोमप्रसाद पाण्डेले सरकार अनशनरत डाक्टर गोविन्द केसीसँग वार्ता गर्न तयार रहेको भन्दै केसीलाई काठमाडौं ल्याएर वार्ता गर्ने बताएका छन् ।
रिपोर्टर्स क्लवमा शुक्रबार उनले सबैको सल्लाह अनुसार केसीलाई काठमाडौं ल्याउनको लागि सरकार तयारी अवस्थामा रहेको र हेलिकप्टरसमेत स्ट्याण्डवाई रहेको भन्दै अनशनरत डाक्टर केसीका जायज मागहरु सरकारले सम्बोधन गर्ने तर नाजायज कुराहरु भने परिमार्जन गर्ने आफूहरुको योजना रहेको सुनाए ।
पाण्डेले भने, ‘डाक्टर केसीलाई अनशन तोडेर वार्तामा आउन सरकारले आह्वान गरिसकेको छ, उहासँग वार्ता गर्न सरकार एकदम तयारी अवस्थामा छ ।’ उनले प्रमुख प्रतिपक्षी दल कांग्रेसले अनशनरत डाक्टर केसीको विषयमा अलिक बढि नै कुरा उठाएको टिप्पणी गरे ।
उनले भने, ‘कांग्रेसले डाक्टर केसीको बारेमा जसरी कुरा उठाएको छ । उसले केसीको बारेमा सरकारमात्रै जिम्मेवार छ भन्ने देखायो, संभवतः डाक्टर केसीले पनि चार तारे झण्डा बोक्नुभएको थियो । त्यसैले उहाँको बारेमा कांग्रेसले अलिक बढि कुरा उठाउनु स्वभाविक हो ।’
उनले कांग्रेसले पछिल्लो समय जताततै अवरोधमात्रै गरेको गुनासो समेत पोखे । उनले भने,‘कांग्रेसको यो हर्कतले उसैलाई फाइदा हुँदैन् । पछिल्लो समय कांग्रेस गैर–जिम्मेवार बन्यो । कांग्रेसकै कारण अहिले संसदीय समितिहरु गठन हुन सकेका छैनन् । प्रतिपक्षी दलले चारवटा समिति माग गरेको छ ।’
कांग्रेसले संसदमा चिकित्सा शिक्षा विद्येयक रोकेको पनि पाण्डले आरोप लगाए । उनले भने, ‘विद्येयकउपर संसदमा सैद्धान्तिक र दफावार छलफल हुन्छ नि । संसदमा प्रशस्त समय हुन्छ । यो विद्येयक पारित गर्न लामो समय लाग्छ । तर काँग्रेसले छलफल नै गर्न नदिई विरोध गर्यो ।’ सरकारले चिकित्सा शिक्षा विद्येयक प्रक्रिया पूरा गरेर नै संसदमा पेश गरेको उनले स्पष्ट पारे ।
