काठमाडौंः चिनियाँ सहयोगमा निर्माण भइरहेको चक्रपथको निर्माण कार्य अन्तिम चरणमा पुगिसके पनि आकाशे पुलको निर्माणमा ढिलाइ हुँदा पैदल यात्रुलाई बाटो काट्न डेढ किलोमिटर सम्म हिड्नुपर्ने समस्या छ ।
चीन सरकारको अनुदानमा बनिरहेको आठ लेनको यो सडकमा पर्याप्त मात्रमा आकाशे पुल र जेब्रा क्रस नहुँदा पैदल यात्रुलाई निकैनै समस्या परेको छ । यो सडकको हरेक तीन किलोमिटरको दुरीमा एक–एक वटा गरी १० किमिको सडकमा जम्मा तीनवटा मात्र आकाशे पुलहरु रहेका छन् ।
यो सडक नेपाल सरकारलाई हस्तान्तरण भएपछि थप सात वटा आकाशेपुल बनाउने सडक विभागको योजना रहेको छ । सडक निर्माण भएर प्रयोगमा आउन थालिसकेकाले पुल निर्माणमा ढिलाइ हुँदा सर्वसाधारणलाई सास्ती भइरहेको आयोजनाका प्रमुख प्रकाश भण्डारीले बताए । चिनियाँ कम्पनीले आगामी पुससम्म सडक हस्तान्तरण गरीसक्ने र त्यतीबेला सम्म सडक विभागले थप सातवटा आकाशेपुल बनाएर सञ्चालन गरिकक्नेगरी काम भइरहेको भण्डारीले बताए ।
सडक विभागले बनाउने थप सात वटा आकाशे पुल बनेपछि भने पैदल यात्रुले बढीमा पाँच सय मिटर मात्र हिडेर पुल सम्म मग्न सकिने छ । यो सडक ५० किमि प्रति घण्टाको गतमा सवारी कुद्न सक्ने गरी बनाइएको छ । सडक निर्माण सम्पन्न भएपछि ट्राफिक नियम पालनामा कडाइ गरिने तथा गति नियन्त्रण गरिने उल्लेख छ ।
आठ लेनको यो सडकको केन्द्रबाट दुबैतर्फ २५ मिटर चौडाइ रहेको छ । दुवै तर्फ सर्भिस ट्रयाक र फुटपाथका लागि थप ११–११ मिटरको क्षेत्र रहेको छ ।
यो सडक निर्माणपछि मोनोरेल सञ्चालन गर्न सकिने गरी निर्माण भएको छ । हाल काठमाडौं महानगरले काठमाडौं चक्रपथमा मोनोरेल निर्माण गर्ने विषयमा आश्यक अध्ययन अगाडि बढाइरहेको छ । यो अध्ययनपछि नयाँ बनेको चिनियाँ लगानीको चक्रपथको बीचबाट नभएर सर्भिस ट्रयाकबाट भने मोनेरेल चलाउन सकिने आयोजना प्रमुख प्रकाश भण्डारीले बताए ।
