काठमाडौं । सरकारले फिल्म क्षेत्रमा मंगलबारदेखि ई–टिकेटिङ/बक्स अफिस प्रणाली लागू गरेको छ । चलचित्र विकास बोर्डमा आयोजित कार्यक्रममा यसकोको शुभारम्भ गरिएको हो । नेपाली फिल्म क्षेत्रमा लामो समयदेखि बक्स अफिसको माग हुँदै आएको थियो ।
यसले फिल्म क्षेत्रमा भएको लगानीलाई सुरक्षित एवं प्रवद्र्धन गर्न र कारोबारलाई पारदर्शी बनाउन सहयोग गर्नेछ । साथै, बक्स आफिस लागू भएपछि कलाकारिता क्षेत्रको प्रवद्र्धनमा सहयोग पुग्ने र राजश्व पनि बढने सम्वन्धित क्षेत्रका व्यक्तिहरु बताउँछन् ।
सञ्चारमन्त्री बाँस्कोटाले ‘क्लिन फिड’ लागू गर्ने उल्लेख गर्दै मन्त्री बाँस्कोटाले श्रमजीवी पत्रकारको तलब बैंकमार्फत दिलाउने व्यवस्था गर्ने तयारी भइरहेको बताए । उनले पत्रकार कल्याणकारी कोषलाई रु एक करोडबाट रु तीन करोड पुर्याउने जानकारी दिए ।
देशका सबै भू–भाग फिल्म छायांकनका लागि उपयुक्त भएको भन्दै उनले देशका सबै क्षेत्रलाई छायांकनका लागि सुन्दर स्थान छन् भन्ने सकारात्मक सन्देश प्रवाह गर्नुपर्नेमा जोड दिए । बाँस्कोटाले सम्भ्रान्त र पूँजीपतिका कथाभन्दा जनआन्दोलनका नायक तथा राष्ट्रिय गौरवका विषयमा फिल्म बन्नुपर्नेमा बताउँदै सम्बन्धित पक्षले त्यस्ता विषयमा ध्यान दिन आग्रह गरे ।
सञ्चार मन्त्रालयका निमित्त सचिव वीरेन्द्रकुमार मिश्रले बक्स अफिस कार्यान्वयनमा आएपछि चलचित्र क्षेत्रमा भएका विकृतिमा सुधार आउने बताए । उनले आगामी दिनमा यस क्षेत्र पारदर्शी एवं जिम्मेवार भएर अघि बढ्ने बताए ।
चलचित्र विकास बोर्डका सदस्यसचिव महेन्द्रप्रसाद साँखीले बक्स अफिसको लागू हुनु ऐतिहासिक काम भएको भन्दै यसलाई सही तबरले कार्यान्वयन गर्न बोर्ड प्रतिबद्ध रहेको बताए । बक्स अफिस अबदेखि उपत्यकाका सबै हलमा लागू भएको छ भने उपत्यका बाहिरका हलमा माघ १ गतेदेखि लागू हुनेछ ।
उक्त प्रणाली जडान भएपछि प्रत्येक सिंगल र मल्टिप्लेक्स हलका सबै तथ्यांक एउटै सर्भर र सफ्टवेयरमा आउँछ । यसो हुँदा निर्माताले आफ्नो फिल्मको कलेक्सन जुनसुकै बेला एकै ठाउँबाट हेर्न भएका छन् । ‘बक्स अफिस’ सर्भरको पहुँच चलचित्र विकास बोर्ड, निर्माता, हल सञ्चालक, वितरक र कर कार्यालयमा हुनेछ ।
