स्याङजा। स्थानीय निकायहरुले जथाभावी कर बढाएर जनता आतंकित बनाइरहेको बेला यहाँको एक नगरपालिकाका मेयरले भने जनतालाई आयस्तर बढाएर मात्रै थप कर लिने घोषणा गरेका छन् ।
वालिङ नगरपालिकाका मेयर दिलिपप्रताप खाँणले जनता धनी नभएसम्म थप कर अशुल्नु न्यायसँगत नहुने भन्दै आफ्नो नगरपालिकामा स्मार्ट सिटी र स्मार्ट भिलेज विकास गर्ने अवधारणा अघि सारेका छन् । नगरभित्र विकास राम्रो भयो भने जनता खुशी भएर आफै कर तिर्न अग्रसर हुने उनको विश्वास छ ।
स्थानीय तहहरुले स्वायत्तताको नाममा कर बढाउँदा सरकार निकै आलोचित बन्न पुगेको छ । प्रदेशहरुले पनि आफ्नो भागमा पर्ने कर उठाउन आवश्यक तयारी गरिरहेका छन् । संघीयता आएपछि देश विकास हुने दलका नेताहरुले बताए पनि सरकार विकासभन्दा कर अशुलीमै अल्मलिएको छ ।
वालिङ नगरपालिका स्मार्ट सिटी हुने भन्दै मेयर खाँडले नगरको विकासको लागि सर्वप्रथम सुशासनसम्वन्धी कानुन बनाउने, लगानीको सुरक्षाको प्रत्याभूतिसहित आकर्षित गर्ने, उत्पादन तथा बजारमा स्थानीय सहभागिता बढाउने बताएका छन् ।
उनले जनतालाई सहज सेवा दिन नगरपालिकाले इन्टरनेट प्रविधिमार्फत नगरवासीले वडामै समेत नपुगी धेरै सेवाहरु घरबाट लिनसक्ने व्यवस्था सुरु गरिएको बताए । त्यसका लागि नगरपालिकाले भदौ १५ गतेबाट नगरपालिका एप्स पनि सार्वजनिक गर्ने तयारी गरेको छ ।
नगरपालिकालाई तिर्नुपर्ने कर, नगरपालिका वा वडा कार्यालयबाट जनताले गर्नुपर्ने कुनैपनि कामका लागि अब कार्यालय धाउनुपर्ने छैन । साथै, नगरपालिकाले इनोभेसन सेन्टर पनि स्थापना गरेको छ ।
यस सेन्टरले नगरपालिकालाई प्रविधिमैत्री र स्मार्ट बनाउने विश्वास मेयर खाँडको छ । सेन्टरमार्फत नगरपालिकाको क्षेत्र भित्रको पिउने पानीको शुद्धता मापन गर्ने, सडक तथा सरकारी कार्यालयमा सेन्सर जडित बत्तीको काम भइरहेको छ छैन ? हेर्ने, जस्ता जनताका आधारभूति सुविधाहरुको अनुगमन गरिने छ ।
इनोभेसन सेन्टरका लागि नगरपालिकाले भारतबाट उपकरणसमेत मगाएको छ । नगरपालिकाभित्र रहेका स्कुल तथा कलेजमा अध्ययनरत विद्यार्थी र विज्ञान शिक्षकलाई यो प्रविधि सिकाउने काम भईरहेको छ ।
वालिङ नगरपालिकाले पाँच वटा औद्योगिक क्षेत्र तयार गर्नुका साथै नगरभित्र उद्योग स्थापना गर्न चाहनेहरुलाई नगरपालिकाले सस्तो मूल्यमा जग्गा उपलब्ध गराउने घोषणा पनि गरेको छ । यी औद्योगिक क्षेत्रमा अहिलेसम्म सात अर्ब रुपियाँको लगानी प्रतिबद्धता आइसकेको खाँणले बताए । यसबाहेक वालिङमा पतञ्जलीले १० अर्ब रुपियाँ लगानी गर्ने जनाइसकेको छ ।
लगानी आकर्षित गर्न नगरपालिकाले छुट दिनुका साथै एक घर एक उद्यमको योजना समेत बनाएको छ । नगरपालिकाभित्रै गाउँले उत्पादन गर्ने र सहरले उत्पादन गरी आत्मनिर्भर बनाउने तरिकाले काम भइरहेको मेयर खाँडले बताएका छन् । साना लगानीका व्यवसायलाई नगर आफैले लगानी गरिदिने र ठूला लगानीमा नगरपालिकाले बैंक ज्ञारेन्टी बसिदिने गरेकाले पनि लगानी आकर्षित भएको हो । बीमाको काम पनि नगरपालिका आफैले गरिदिने गरेको छ ।
नगरपालिकाले ‘वान कलर वान प्रोडक्ट’ अन्तर्गत एउटा गाउँमा एउटै कलर लगाएर एउटा गाउँबाट एउटै वस्तु उत्पादन गर्ने अवधारणा अधि बढाएको छ । त्यसबाहेक नगरपालिकाबाट उत्पादित फोहरलाई व्यवस्थापन समितिहरु बनाएर जैविक मल बनाउँदै आम्दानी गर्नेदेखि खेलकुदको विकासको लागि पनि काम गरेको छ ।
केन्द्र र प्रदेशले कर बढाए त्यसमा नगरपालिकाले अनुदान दिएर भए पनि बढि कर नगरवासीलाई नतिराउने नीति वालिङ नगरपालिकाले लिएको छ । केन्द्रले धेरै अनुदान दिँदा स्थानीय तह धेरै परनिर्भर हुने भएकाले सकेसम्म स्थानीय साधन स्रोत जुटाएरै नगरपालिकोको विकास गर्ने सोच खाँडले अघि सारेका छन ।