काठमाडौं । सैनिक कल्याणकारी कोषको यथार्थ मौज्दात ४१ अर्ब २९ करोड ८२ लाख ४६ रुपियाँ पुगेको छ ।
कोषद्वारा सैनिक मुख्यालयमा बुधबार आयोजित पत्रकार सम्मेलनमा कूल मौज्दातमध्ये पाँच अर्ब ५२ करोड ५७ लाख ८७ हजार रुपियाँ विभिन्न आयोजनामा लगानीमा रहेको जानकारी दिइयो । नेपाली सेना संयुक्त राष्ट्रको आह्वानमा शान्ति सेनामा सहभागी भएवापत प्राप्त करीब एक करोड २४ लाख एक हजार रुपियाँबाट २०३२ सालमा स्थापना भएको उक्त कोषमा अहिले नगद मौज्दात ३५ अर्ब ७७ करोड २४ लाख ५९ हजार रुपियाँ रहेको छ ।
कोषको मौज्दातमध्ये नेपाल राष्ट्र बैंकले समस्या घोषणा गरेका बैंक तथा वित्तीय संस्थासँग सैनिक कल्याणकारी कोषले प्राप्त गर्नुपर्ने सावाँ २२ करोड ९७ लाख ६७ हजार रुपियाँ रहेको छ । कोषले बहालवाला तथा भूपू सैनिकका परिवारका लागि स्वास्थ्य, शिक्षा रोजगारी तथा आवास क्षेत्रमा सहयोग पुर्याउँदै आएको छ । उक्त कोषको मुख्य स्रोत बैंकमा निक्षेप गरिएको रकमबाट प्राप्त हुने ब्याज, शान्तिसेनाबाट प्राप्त हुने रकम, शिक्षण संस्थाबाट प्राप्त हुने शुल्क र विभिन्न आयमूलक परियोजनाबाट हुने रकम हो ।
