काठमाडौं । लगानी बोर्ड र मुक्तिनाथ दर्शन प्रालिबीच वीरेठाँटीदेखि मुस्ताङको मुक्तिनाथ मन्दिरसम्म केवलकार लाइन विकास तथा सञ्चालन गर्न समझदारी भएको छ ।
समझदारीपत्रमा बोर्डका प्रमुख कार्यकारी अधिकृत महाप्रसाद अधिकारी र कम्पनीका अध्यक्ष अरुण सुवेदीले हस्ताक्षर गरे । कम्पनीले विकास गर्ने मुक्तिनाथ केवलकार प्रणालीमा करिव ८३ दशमलव ६५ किलोमिटर लामो केवलकार लाइन निर्माण हुनेछ ।
लाइनमा छ वटा स्टेशन रहनेछन् । ती स्टेशनहरुलाई वीरेठाँटीदेखि घोरेपानी, घोरेपानीदेखि तातोपानी, तातोपानीदेखि लेते मार्फा ट्रान्जिटदेखि जोमसोम, जोमसोमदेखि कागबेनी र कागबेनीदेखि मुक्तिनाथ खण्डमा विभाजित गरिएको छ ।
आयोजनाको लागत ३५ करोड अमेरिकी डलर अनुमान गरिएको छ । गत वैशाख १५ मा बसेको लगानी बोर्डको बैठकले उक्त प्रस्तावलाई स्वीकृत गर्नुका साथै यसको लागि उक्त कम्पनीसँग विस्तृत परियोजना प्रतिवेदन (डीपीआर) तयार गराउन बोर्डको कार्यालयलाई निर्देशन दिएको थियो ।
समझदारी भएको मितिले १८ महिनाभित्र डीपीआर तयारी गरी बोर्डमा पेश गर्नुपर्नेछ ।
