काठमाडौं । नेपाल प्रहरीमा जागिर खान चाहनेहरुका लागि नयाँ भर्ना खुलेको छ । प्रहरी प्रधान कार्यालयको मानवस्रोत विकास विभाग, भर्ना तथा छनोट महाशाखाले प्रहरी निरीक्षक, प्रहरी सहायक निरीक्षक, प्रहरी जवान, कार्यालय सहयोगीलगायतका पदहरुमा ठुलो संख्यामा कर्मचारी माग गरेको छ । यस शाखाले पहिलो पटक ७ हजार २ सय ५६ रिक्त दरबन्दीमा भर्ना आह्वान गरेको हो ।
जनपथतर्फ प्रहरी निरीक्षकमा १०८ जना र प्रहरी सहायक निरीक्षकतर्फ ५ सय २४ जना माग गरिएको छ । त्यस्तै प्रहरी जवान तर्फ ६ हजार २ सय ४४ जनाका लागि दरखास्त आह्वान गरिएको छ ।
प्रहरी कार्यालय सहयोगी (खेलाडी) पदमा ३० जनाको माग गरिएको छ । खेलाडीतर्फ फुटबल, भलिबल, क्रिकेट, तेक्वान्दो, भारोत्तोलन, कँराते, जुडो, एथ्लेटिक्स, बक्सिङ, ब्याडमिन्टन र महिला कबड्डी विधामा मात्र दरखास्त दिन पाइनेछ ।
दरखास्त फारम असोज १८ देखि कात्तिक २९ गतेसम्म बुझाउन सकिनेछ । प्रहरी निरीक्षक र प्रहरी सहायक निरीक्षक पदका लागि महानगरीय प्रहरी कार्यालय, रानीपोखरी तथा सात वटै प्रदेश प्रहरी कार्यालयमा फाराम बुझाउने व्यवस्था मिलाइएको छ । जवान पदको दरखास्त काठमाडौं, ललितपुर, भक्तपुरसहित सबै जिल्ला प्रहरी कार्यालयहरु तथा प्रदेश प्रहरी कार्यालयमा बुझाउन सकिनेछ ।
