काठमाडौं। काभ्रेपलाञ्चोकका भुकम्प पीडितको आवास निर्माण अनुदान रकम बैंक खातामा पठाइएको छ ।
दशैँअघिसम्म राष्ट्रिय पुनःनिर्माण प्राधिकरण, जिल्ला आयोजना कार्यान्वयन एकाइसँग माग गरिएको रकम बैंक खातामा पठाइएको जिल्ला प्राविधिक कार्यालयका प्रमुख लोकनाथ रेग्मीले बताएका छन् । उनका अनुसार “दशैँअघि दोस्रो र तेस्रो किस्ताको रकमको माग भइआएका भूकम्पपीडितको रकम सम्बन्धित सबैका बैंक खातामा पठाइसकिएको छ ।”
कार्यान्वयन एकाइका अनुसार यहाँ भूकम्पपछि ६८ हजार ७७३ घरपरिवारले अनुदान सम्झौता गरी पहिलो किस्ताको रकम लिएका थिए । पहिलो किस्ता लिएकामध्ये कात्तिक दोस्रो सातासम्म १८ हजार ९१९ पीडितले घर पुनःनिर्माण सम्पन्न गरेको र ४४ हजार ७५७ पीडितले दोस्रो किस्तावापतको रकम बुझेका छन् । भूकम्पबाट क्षति भएका जिल्लाका ११२ गुम्बाको पुनःनिर्माणका लागि सर्भे गर्ने काम सम्पन्न भई प्राधिकरणमा पठाइसकिएको प्रमुख रेग्मीले जानकारी दिए ।
