काठमाडौं । मेगा बैंकको पूर्ण स्वामित्वमा रहेको मेगा क्यापिटल मार्केटस् लिमिटेड सञ्चालनमा आएको छ । राजधानीमा शुक्रबार साँझ नेपाल धितोपत्र बोर्डका अध्यक्ष रेवतबहादुर कार्की र मेगा बैंक अध्यक्ष भोजबहादुर शाहले संयुक्तरुपमा उद्घाटन गरे ।
कार्यक्रममा अध्यक्ष कार्कीले नेपालमा मर्चेन्ट बैंकिङको विकासक्रम बढ्नु खुसीको कुरा रहेको बताए । मर्चेन्ट बैंकिङको बजार काठमाडौँ बाहिर पनि विस्तार भएकाले ग्राहकहरुले कम लागतमै सहज र सरल ढंगले सेवा पाउन थालेको बताए । उनले मेगा क्यापिटललाई नयाँ मोडलमा काम गर्न शुभकामना पनि दिए ।
यसैगरी, मेगा बैंकका अध्यक्ष शाहले मेगा क्यापिटलले छोटो समयमै प्रगति गर्ने बताए । कम्पनीले पुँजीबजारमा नयाँ किसिमले काम गर्ने बताए ।
मेगा बैंककी सिइओ अनुपमा खुञ्जेलीले मेगालाई सबै नेपालीको बैंक बनाउने योजना अनुसार सम्पूर्ण बैंकिङ सेवा प्रदान गर्न बैंक कटिबद्ध रहेको बताइन् । उनले मेगा बैंकका देशभर छरिएका १०२ शाखाबाट मेगा क्यापिटलका पनि सबै सेवाहरु उपलब्ध गराउने बताए ।
मेगा क्यापिटलका अध्यक्ष इश्वरबहादुर गुरुङले ग्राहकको सुविधा र लगानी उद्देश्य तथा आवश्यकतालाई ध्यानमा राखी नविन र उपयुक्त सेवाहरु पूँजीबजारमा ल्याउनु नै कम्पनीको मुख्य उद्देश्य रहेको बताए । पूँजीबजारसँग सम्बन्धित डिम्याट खाता संचालन, निष्काशन तथा बिक्री प्रबन्ध, धितोपत्र प्रत्याभूति, शेयर रजिष्ट्रेशन, लगानी व्यवस्थापन, संस्थागत परामर्श जस्ता मर्चेन्ट बैंकिङ सेवाहरु आफ्नो त्रिपुरेश्वरस्थित केन्द्रीय कार्यालय, साकेत कम्प्लेक्सबाट प्रदान गरिने मेगा क्यापिटल मार्केट्स लिमिटेडका सिइओ सुदयकान्त झाले बताए ।
मेगा क्यापिटल मार्केटस् लिमिटेडले चैत्र १८ गते मर्चेन्ट बैकिङ व्यवसाय गर्नका लागि नेपाल धितोपत्र बोर्डबाट अनुमतिपत्र प्राप्त गरेको थियो । मेगा क्यापिटलको अधिकृत पूँजी ३० करोड छ भने चुक्ता पूँजी २० करोड रुपियाँ रहेको छ ।
