सुन आज पनि प्रतितोला ७ सय रुपियाँ बढ्यो, यस्तो छ आजको बजार भाउ

Advertisement

काठमाडौँ । सुनचाँदीको मूल्य दिनदिनै उकालो लागिरहेको छ । साताको पहिलो दिन आइतबार प्रतितोला ५ सय रुपियाँ बढेको सुनको मूल्य हिजो एकै दिन प्रतितोला १ हजार २ सय बढेको थियो भने आज पुनः प्रतितोला ७ सय रुपियाँ बढेर कारोबार भइरहेको छ । सुनसँगै चाँदीको मूल्य पनि निरन्तर बढिरहेको छ । आइतबार प्रतितोला ५ रुपियाँ, हिजो सोमबार प्रतितोला ५५ रुपियाँ बढेको चाँदी आज फेरि प्रतितोला ३५ रुपियाँ बढेर कारोबार भइरहेको छ । नेपाल सुनचाँदी व्यवसायी महासंघका अनुसार आज छापावाल सुन प्रतितोला ९८ हजार २ सय रुपियाँ, तेजावी सुन प्रतितोला ९७ हजार ७ सय ६० रुपियाँ र चाँदी प्रतितोला एक हजार २ सय ४५ रुपियाँमा कारोबार भइरहेको छ । हिजो भने छापावाल सुन प्रतितोला ९७ हजार ५ सय रुपियाँ, तेजावी सुन प्रतितोला ९७ हजार ६० रुपियाँ र चाँदी प्रतितोला एक हजार २ सय १० रुपियाँमा कारोबार भएको थियो । अन्तर्राष्ट्रिय बजारमा सुनको मूल्य बढेकाले स्थानीय बजारमा पनि त्यसको प्रभाव देखिएको महासङ्घका अध्यक्ष मोहनकुमार सुनारले बताए । अन्तर्राष्ट्रिय बजारमा पनि पहेँलो धातुको मूल्य निरन्तर उकालो लागिरहेको छ । अध्यक्ष सुनारले अन्य क्षेत्रको तुलनामा सुनप्रति लगानीकर्ताको आकर्षण देखिँदा पनि सुनको मूल्य बढेको बताए । दैनिक सुनको मूल्य निरन्तर वृद्धि हुँदै गएपछि कारोबार भने ठप्प भएको छ । “नेपाली बजारमा मुख्यतः कोरोनाको असरका कारण कारोबार शून्य भएको हो”, उनले भने । तत्काल सुनको मूल्य घट्ने सङ्केत आफूले नपाएको उनले बताए । देशभरका सुनचाँदी व्यवसायीले सुनको कारोवार ठप्प भएको आफूलाई जानकारी गराएको उनले बताए । “अहिले सुन पसलले ‘बोहोनी’ पनि नभएको बताएका छन्”, अध्यक्ष सुनारले भने ।

Advertisement

Advertisement

Advertisement