काठमाडौं। कर छलीसम्वन्धी राष्ट्रिय अनुसन्धान विभागले गर्दा गरेको मुद्दामा हल्का पेय पदार्थ पेप्सी उत्पादक कम्पनी वरुण वेभरेजका उच्च अधिकारीलाई अदालतले पुर्पक्षका लागि थुनामा पठाउन आदेश दिएको छ । उच्च अदालत पाटनका मुख्य न्यायाधीश कुमार चुडाल र न्यायाधीश कुलप्रसाद शर्माको इजलासले वरुण वेभरेजका प्रवीणकुमार अग्रवाललाई थुनामा पठाउन आदेश दिएको हो।
बिहीबार भएको थुनछेक बहसपछि उनलाई थुनामा राख्न आदेश दिइएको छ । सोही मुद्दामा दुई जना धरौटीमा रिहा भइसकेका छन् भने तीन जना अझै फरार छन्। विभागले केही महिनाअघि वरुण वेभरेजमा मूल्य अभिवृद्धि कर र आयकर गरी ६४ करोड ९६ लाख रुपियाँ कर छली भएको खुलासा गरेको थियो ।
नक्कली बिजकको कारोबार गर्ने व्यक्तिहरुसँग मिलेमतो गरी मालवस्तु नै खरिद नगरी राजस्व चुहावट गरेको अभियोगमा विभागले कम्पनीका सञ्चालकहरू अमित गुप्ता र रविकान्त जयपुरियासहित सात जनाविरूद्ध ६४ करोड ९६ लाख दुई हजार ३४० रुपियाँ बिगो र बिगोको दोब्बर जरिवाना एक अर्ब २९ करोड ९२ लाख ४ हजार ६ सय ८० रुपियाँ समेत गरी एक अर्ब ९४ करोड ८८ लाख ७ हजार २० रुपियाँ दाबी गरेको थियो। यस्तै दोषीहरुलाई तीन वर्षसम्म जेल सजायको माग दाबी पनि गरिएको छ ।