‘निजी कम्पनीलाई १ प्रतिशतमा ऋण, वायुसेवा निगमले चाहिँ ११ प्रतिशत कसरी तिर्नसक्छ ?’

काठमाडौं । नेपाल वायुसेवा निगमका प्रवन्ध निर्देशक डिमप्रसाद पौडेलले नेपालकै निजी वायुसेवा कम्पनीले १ प्रतिशतमा ऋण पाएको अवस्थामा नेपाल वायुसेवा निगमले ११ प्रतिशतमा ऋण लिनु परेको भन्दै गुनासो गरेका छन् ।  उनले यति चर्को ऋण लिएर निगम चल्न नसक्ने बताएका छन् ।

कर्पोरेट नेपालसँगको कुराकानीमा उनले निजीको बुद्ध एयरले १ प्रतिशतमै विश्व बैंकअन्तर्गतको अन्तर्राष्ट्रिय वित्त निगम (आईएफसी)बाट एक प्रतिशत ब्याजदरमै ऋण लिएको औंल्याउँदै भने ‘निगमले चाहिँ दोहोरो अंकको ऋण लिएका छ । यस्तो ऋण बढेर ४० अर्ब रुपियाँ नाघिसक्दा पनि सरकारले लगानी नथपे यति ठूलो ऋण तिर्नसक्ने अवस्था निगसँग छैन् ।’

ऋणका कारण निगम यतिबेला ठूलो आर्थिक संकटमा परेको छ । अन्तर्राष्ट्रिय उडानमा चारवटा र अन्तरिक उडानमा दुईवटा मात्रै जहाज रहेको निगम थोरै जहाजबाट धेरै गन्तव्यमा सेवा दिने वायुसेवा पनि हो । निगमले नेपाल उडान गर्ने ३० वटासम्मका विदेशी वायुसेवासँग प्रतिस्पर्धा गर्दै आएको छ । 

आन्तरिक उडानमा सेवामूलक मात्रै भएको निगमसँग स्थानीय वायुसेवा कम्पनीसँग प्रतिस्पार्धा गर्ने गरी उडान सञ्चालनका लागि पर्याप्त जहाजसमेत छैन् । चीन सरकारले ऋण तथा अनुदानमा उपलब्ध गराएका जहाजहरू बर्षौंदेखि सञ्चालन गर्न नसक्दा निगमलाई अर्बौं रुपियाँ नोक्सान भएको छ । 

पौडेलले सरकारी वायुसेवाले हवाई उड्डयनको क्षेत्रमा महंगो व्याजदरमा ऋण लिनु परेको कारण व्याजका लागि बार्षिक चार अर्ब रुपियाँ तिर्नुपरेको, इन्धन महंगो हुँदा त्यत्तिकै व्ययभार बढिरहेको बताए । अन्य मुलुकको तुलनामा नेपालमा हवाई इन्धनको मूल्य निकै धेरै रहेको उनको भनाई छ । 

साथै, पौडेलले निगमको व्यवस्थापनमा सुधार हुन नसकेको स्वीकार गर्दै निगमसँग भएका जहाज कोभिडको कारण ५० प्रतिशतभन्दा बढी क्षमतामा सञ्चालन हुन नसकेको र सञ्चालन खर्च मात्रै बढेको बताए । अब कहिलेबाट निगमले जहाजको किस्ता तिर्न सक्छ ? भनेर भन्न नसक्ने अवस्थामा आफूहरु पुगेको उनले बताए । ऋण बढ्दै जाँदा थप समस्या हुनसक्ने पौडेलको चिन्ता छ । पौडेलसँग गरिएको थप कुराकानी भिडियोमाः