क्वारेन्टिनका लागि पाँचतारेसम्मका ७८ होटल सूचीकृत, शुल्क तोक्ने जिम्मा सम्बन्धित होटललाई

काठमाडौं । विदेशबाट नेपाल आउने अन्तर्राष्ट्रिय हवाई यात्रुलाई राख्न सरकारले पर्यटकस्तरदेखि पाँचतारेसम्मका होटल सूचीकृत गरेको छ । पर्यटन विभागले पर्यटक स्तरदेखि पाँचतारेसम्मका ७८ वटा होटलको सूची सार्वजनिक गर्दै क्वारेन्टिनस्थलको रूपमा प्रयोग गर्ने होटलको न्यूनतम मापदण्डसमेत तय गरेको छ ।

संस्कृति, पर्यटन तथा नागरिक उड्डयन मन्त्रालय अन्तर्गतको पर्यटन विभागले सार्वजनिक गरेको यस्ता होटल अब भोलि विहीबारदेखि नियमित उडानबाट आउने अन्तर्राष्ट्रिय उडानका हवाई यात्रुलाई राख्न प्रयोग हुने उल्लेख छ । यस अघि भारतबाट आउने यात्रुलाई राख्न तय भएको ८ वटा होटलसहित थप ७० वटा होटल क्वारेन्टिनका लागि सूचीकृत भएको पर्यटन विभागले जानकारी दिएको छ ।

पर्यटक स्तरका होटलले दैनिक तीन हजार रुपियाँ प्रतिव्यक्ति लिन पाउने यस अघिकै व्यवस्था अनुसार गर्ने भनिएपनि तारे होटलसमेत क्वारेन्टिनको लागि तोकिएकोले ती होटल आफैंले शुल्क तय गर्ने जानकारी तामाङले दिए । तीनतारेदेखि पाँचतारेसम्मका होटल क्वारेन्टिनका लागि सूचीकृत भएका छन् । ती होटलमा पाहुना राख्न शुल्क तय गर्ने जिम्मा सम्बन्धित होटललाई नै दिइएको र यस पटक सरकारले शुल्क तोक्ने विषयमा केही उल्लेख नगरेको उनले जानकारी दिए ।

विभागका अनुसार सूचीकृत होटलले नेपाली तथा विदेशी नागरिकहरू विदेशबाट नेपाल आउँदा पालना गर्नुपर्ने मापदण्ड पालना गर्नुपर्ने र तोकिएको क्षेत्रका होटल पनि हुनैपर्ने व्यवस्था पनि छ । सरकारले विदेशबाट आउने हवाई यात्रुलाई अनिवार्य १० दिन क्वारेन्टिनको व्यवस्था गरेको छ । खाडी मुलुकाबाट आउनेले पाँच दिन बसे पुग्छ । विशेष परिस्थिति भएकालाई होम क्वरेन्टिनमा पठाउने व्यवस्था पनि गरेको छ ।

विभागले सार्वजनिक गरेको यस्तो सूचीमा यस अघि भारतबाट आउने उडानका लागि तय भएका ८ होटल छन् । त्यो बाहेक ७० होटलमा ७ वटा पाँचतारे, ३ वटा चारतारे, ७ वटा तीनतारे, ५१ वटा पर्यटक स्तरका र बाँकी २ वटा रिसोर्ट क्याटगोरीका होटल छन् ।

यात्रुकै माग अनुसारको होटलमा राखिने
सरकारले पर्यटक स्तरका होटललाई प्रतिव्यक्ति तीन हजार रुपैयाँ लिने  भनेपनि तारे होटलको शुल्क भने सम्बन्धित होटलले आपसी सहमतिमा तोक्ने भएका छन् । पर्यटक स्तरका होटलमा मजदुरीबाट फर्केका नेपाली राख्न प्रयोग गरिने छ । तारे होटल भने विदेशीलाई राख्न प्रयोग हुन्छ । पैसा तिर्न सक्छु भन्ने नेपाली पनि स्वच्छाले पाँचतारेसम्म पनि बस्न पाउने छ ।

खाडी मुलुकबाट आउने नेपालीले महंगो शुल्क तिर्न सक्दैनन भने उनीहरूलाई सस्तो होटलमै राखिने हानको भनाइ छ । पैसा तिर्न सक्ने र तीनतारे भन्दा माथि बस्न चाहने नेपाली पनि रहेको र उनीहरूबाट माग आएको छ । विदेशी नागरिकलाई तीनतारे माथि राख्ने र नेपालीलाई भने पर्यटक स्तरमा राख्ने गरी होटल तय भएको होटल संघ नेपाल (हान)का प्रथम उपाध्यक्ष विनायक शाहले बताए ।

उनले भने ‘यस अघि भारतबाट एयर बबलमा आउनेले पनि महंगा होटल खोजेकोले पनि नयाँ होटलहरू थप गरिएको छ ।’ अन्य होटलले भने प्याकेज दिएका र अहिले होटल खाली भएको समयमा महंगो नलिइ प्याकेजमा सस्तो सेवा नै दिने सकिने जानकारी पनि हानका उपाध्यक्ष शाहले बताए ।

ठमेल क्षेत्रका होटल ३० होटल सूचीकृत गर्न सुझाव
सरकारले ठमेल क्षेत्रका होटललाइ क्वारेन्टिमा नराख्ने व्यवस्था गरेकोल विभागले उक्त क्षेत्रका होटल समेटेको छैन् । व्यवसायीले भने ठमेल क्षेत्र पर्यटकीय गन्तव्य भएको, आवासिय भन्दा व्यवसायिक क्षेत्र नै भएकोले पनि ठमेलका होटल समावेश गर्न सरकारलाई आग्रह गरिएको हानका महासचिव साजन शाक्यले बताए ।

उनका अनुसार ठमेल क्षेत्रका थप ३० वटा होटल समावेश गरेर थप सूची आउने र सोसँगै शुल्क पनि तय हुने जानकारी दिए । शाक्यका अनुसार पर्यटक स्तरका होटलालाई सरकारले नै प्रति व्यक्ति दैनिक तीन हजार भनेको छ । सो शुल्कमा तीनतारे भन्दा माथिका होटलमा पाहुना राख्न सकिदैँन् ।

बाहिरबाट आउने नागरिक आफैंले होटल बुकिङ अनिवार्य गरेरै आउनुपर्छ । बाहिरबाट आउने पाहुनाले बुकिङ आउनैपर्ने भएकोले पनि  पाहुनाबीचको सहमतिमा वा होटलले तोकेकै शुल्कमा तारे होटलमा बस्नुपर्ने पनि हुन्छ । अघिल्लो वर्ष धेरै शुल्क नपर्ने र महंगो शुल्क तिर्न नसक्नेलाई सस्तो होटलमै राखेर विदेशी, पैसा तिर्नेलाई मात्रै पाँचतारे र रिसोर्टमा लैजाने पनि हानको भनाइ छ ।

क्वारेन्टिस्थलको रूपमा प्रयोग हुने होटलहरूको सूची